OKM – Tetsü Oshi Wazüka Ayuba Mapatong asembuba shilem tetoktepba Khensa yimdak akadang sentong merakettsür, OM Tongti Zülur, Dr. Rongsenchiba den tetoktepertem, OKM ketdangsürtem, tetendangertem, shilem agirtem aser Khensa yimsüsürtem külemi tangokba noksa nung angur. Mokokchung, 8th November, 2022        

Ongpangkong Kaketshir Mungdang (OKM) – Tetsü Oshi Wazüka Ayuba Mapatong kübok “tetsü oshi tali senputi” omen dak rangloker shilem asembuba Sangro Züngtep (slam poetry) tetoktepba sentong ka ‘clean election’ onük nung 8th Nov, 2022 nü Khensa yimdak ayongzüka kaogo.

              Sentong merakettsür Ongpangkong Mungdang (OM) tongti zülur, Dr. Rongsenchiba-i jembidang, oshi ya sobaliba nung telen tongtibang ka lir, oshiji samara sobaliba ajak samatsü, ta ashi.   

Paisa tetsü oshi wazüka ayutsü atema tebilemba kar lemsatepdang, Aor ajaki Ao oshi jembitettsü, züngtettsü, zülutettsü merangtsüla, iba den külemi Aor yim shia nungi ojangtem bendena bushiloksemtsüla aser rendaktsütsütsüla, ta ashi.

              Ao oshi wazüka ayutsü asoshi Aor lokti tentet mungdang ajak nung Ao oshi temeja agi sentongtem adoktsüla aser jembitsüla, ta paisa ayongzük.

              Tanü putu ya akhi ama masü, küm ishika lirbo tanga kin den meyoktepa alidang, asen sobaliba benjatsü aser tangar oshi agi asenok amokbangtsü, anungji, iba ama tensa tia mataloktsü asoshi Aor senso shiai pei tetsü oshi tali senputsü paisa shisema liasü.

              Sangro Züngtep tetoktepba nung OKM kübok unit 9-i shilem agia liasü aser takokertemji; mezüngbuba Kr. Kajenkala Jamir (Ungma), tanabuba Sb. Sashitongzük (Longmisa) aser tasembubaji Kr. Sentikümla M Longkumer (Chuchuyimpang) liasü. Takoker nem senpet sen den kulikaket agi senpettsü. Tetsü Oshi Wazüka Ayuba Mapatong ya OKM-i 2015 nungi tenzüka sentong tapu balala kayonga arur.  

Iba sentong nung Ao Kaketshir Mungdang Tongti Zülur – Nekmi Longkumer, OKM tir – Limatongzük Jamir, OKM – Tetsü Oshi Wazüka Ayuba Luden Tayonger – Sashimeren, Khensa Village Council Chairman – Imtitoshi parnoki shilem balala agia liasü. OKM Tongti Zülur Sungjemjang Kichu iba sentong nung menden liasü.

Khensa Baptist Arogo Pastor – Rev. K Temjen Longchar den temoatsü meshia sarasademer sentong tenzük aser Khensa Baptist Arogo Assoc. Pastor (W) Opangmenla-i tenüngsang agüja sarasademer sentong tembang. Khensa Shisashir Telongjem-i ken tajung ka tena tesentepertem ayongzük.    

*****