Mokokchung civil hospital (IMDH)-i aoba lenmang yanglushitsü asoshi koba sen lemzükja lir, ibaji yaktatiba nung agütsütsüla, ta ward pezü lanur telungjem – Penli youth association tir – Imlikumzuk, Majakong youth association tir – Lanulemba Longchar, Lijaba Lijen youth association tir – Nungsangyanger aser Artang youth association tir- Lanunungsang parnoki külemi Nagaland Chief Minister dangi züluba chiti ka koba osangzülurtem nem agütsü, yangji shia liasü.
Iba chiti nung shia aliba agi, Sept 22, 2022 nü 13th Nagaland Legislative Assembly 12 buba NLA senden amendang, department of urban development and municipal affairs kübok Dr. Imkongliba Memorial District Hospital (IMDH) Mokokchung ajanga senzüba lenmangtem yanglushitsü asoshi sen 1.7 crore lemzüktsüba osang angashia Mokokchung nüburtem kanga pelaa liogo aser iba mapaji tsüngküm arur tenzüktsü, ta osang balala ajanga sangoktsüogo.
Aji süaka, Mokokchung Urban Development office nungi angazükba agi, lenmang atema sanctioned asüba senji tanü tashi parnok dangi arua mali, iyongji lenmangji tang tashi meyanglushiteti lir. IMDH lenmang tang aliba tiaji reprangdangra kangasa majung, talisa shirangertem aser iba lenmang nung senzüsenpongertem temeimtsüka timtemteper. Iba lenmang majungba atema tamalena züluogo, anungji, iba dak sentakba nung “na tiyongzüi aitdaktsünür aser lemzüktsüba senji yaktatiba nung chioktsü mepishir”, ta ward pezü lanur telungjem-i CM dangi züluba chiti nungjisa shisema liasü.
The Nokinketer 