Nagaland RD Minister, Metsübo Jamir-i 23rd Nov, 2022 nü Longjang yimdak tayimtsü anendak ‘Helipad’ ka lapoktsüogo. Iba helipad ya 3 buba medemchanger Longjang lanu tata züngari yangluba lir. Longjang yim ya Mokokchung town nungi kilometer 36 shi pilar lir.
Tetushi tesemdanger, Metsübo Jamir-i iba sentong nung jembidang, district headquarter aika nung helipad makaba mapang ka Longjang yimdak yanglutetba ya atamata masü, Nagaland nungbo ibai otsüsütsü ka asütsü, anungji, mezüng Nagaland Chief Minister adokba yim ka dang masü saka ibai Nagaland nung yimtsüng rongnung mezüng helipad asütsü, ta metetdaktsü.
Yimdak yimtsüng aser lokti aika nung sorkar sen aruba dang atar, sorkari sen magütsüra mapa kecha meinyaker, iba jaklaji majung ta jembiba mapang ka, 3 buba Medemchanger Longjang Lanu Tata Züngai mapa tajung inyaka Aor aser Naga nunger songjen dang tatishitsü tajung sayuba asoshi pai mulungnen lemsatep.
Iba Helipad ajanga Longjang nunger dang masü saka yim temeket nung alirtem ajak tajangzük angutsü imlar, ta paisa shisem.
Longjang ya Tsüngremi temoatsü agütsüba yim ka lir ta züngshir, yangi tsünüsembong balala tangalen madokba aika adokba angazüker, ibai takar yim ka, anungji, meranga inyaktsü asoshi paisa yimertem ajungshia liasü.
RD maparen ya shir yimtsüngi mapa tajungba inyakdir, par yimerji department-i balaka repranger, anungji, maparen ajak nung maneni tangar dang alakteta inyaktsü asoshi paisa ayongzüksem.
“Politics agi akangtepba yabo khen atema dang asür, saka sobaliba nung akangtepba yabo mepilar”, anungji, taoba mapang nungi Longjang den par kinungertemi koma akangtepa aruogo, maneni maparen ajak akokba tashi yariteptsü mulunga lir, ta paisa metetdaktsü.
Longjang yimdak tanü lapokba Helipad ya sorkari maparen balala nung amshitsü atema temelaba (Order No. NST/HIL/412/2022-23/728) agütsüogo. Iba helipad yanglutsü atema ali kimung ya Chubasashi Longchar aser Temsuningsang Aier nati tenla.
Iba Helipad ya LBC Pastor, Sentilong-i meshitettsü. Helipad Construction committee convener, T. Temjen Jamir-i tarurtem pela-a agizükba den helipad yangluba osang agütsü. Longjang Village Council tenüng nung yimsüsür, Imtiningsang Longchar-i mapang tatsüka agia jembi. Watsü Telen Longjang-i tetushi tesemdanger, Metsübo Jamir nem ken tajung ka tenloktsü.
(www.nokinketer.com)
The Nokinketer 