Sempet balala (Art), kentenmenü (music), sütoksünem (entertainment) aser sentong tapu balala ajungkettsü aser service tajungtiba agütsütsü nükla yur Mokokchung nung sentong tapu balala ayongba/anepaluba telok ka tenüng agi “Event Creator Mokokchung (ECM)” ta sür tentetogo. ECM tentetba sentong yangi Mokokchung Bambusa Restaurant nung 25th Nov aonung agiogo.
ECM ya Mokokchung nungi business inyaker par pungui tentet. Event Creator Mokokchung tentetsa par telok yagi taruba ita Dec 15 & 16 anogo ananü Yimchalu Ground nung “Happy Hills Festival 2022” ta sür benjong tuluka ayongzüktsü sentong renema lir, ta metetdaktsüogo. Yimchalu yim ya Mokokchung nungi kilometer 15 shi pilar lir. Iba yim anasa Süngratsü, Mopungchuket aser Impur lir. Anungji, raliwalirtem atema tetemsü tesem ka asütsü.
Iba benjong ya “creating memories with families and friends” omen dak rangloker amungtsü. Anogo ananü agitsü aliba benjong nungji – tanurtem atema kids bouncing castle, noksa agidak photo booth aser tejangrar atemabo camping site amala dena agütsütsü. Iba den ano osettsüset tapu balala ayokdak, chiyungtsü ayokdak (food court) balala, kentenmenü (live music), asaya tapu balala saidak (game zone) aser ano tapu aika, ta parnokisa ashi.
Jangratemtsükaji, Dec 16 aonung India nung nüngtugu rock band “Girish and the Chronicles (GATC)”-i shilem agitsü. GATC band ya Gangtok (Sikkim) nungi lir saka parnok ya 2013 nungi Bangaluru, Karnataka nung alir. Par band züngsemtemji; Girish Pradhan (Vocal), Yogesh Pradhan (bassist), Suraz Sun (guitar) aser Nagen Mongrati (drums). GATC concert reprangnür atema ticket jenjang – 2000/- (admit 3), 1000/- (admit 2) aser 300/- (admit 1) alitsü aser ticket-ji Mokokchung nung Bambusa Restaurant, Unique Bakery aser Urban Hub Restaurant-tem nung angutsü.
Anogo ananüji anüngdang benjongteptsü aser aonung kentenmenü sentong akatsü. Dec 15 aonung Mokokchung nungi nüngtugu band “Tune-up Channel” den ano tanga band kari shilem agitsü.
“Happy Hills Festival 2022” ya Mokokchung nung kümshi ayongba benjong ka südaktsütsü merangtsü aser iba sentong ajanga raliwalirtem puatsü aser liso nisungtem lenla aisü nung tajangzük angutsü aser ajungkettsütsü imlar, ta ECM züngsemtemisa metetdaktsü.
Iba benjong daki arurtem amajok mesüdaktsütsüsa akok tashi sentongtem ajak tajungtiba nung ayongtsü merangtsü, anungji, Mokokchung nung alirtem dang masü alima tesem ajak nungi arua shilem agitsü ayongzüker, ta tayongertemisa metetdaktsü.
Iba sentong nung Nagaland Tourism department den Nagaland Post, Hotel Whispering Winds, MP TV, Mokokchung Channel, Hike & Heal, Mokokchung Times parnokia lenmang balala ajanga yariteptsü. Kari danga iba benjong dak sentakba nung osang tejangja metetnüra iba mobile number – 8787496853/7005581105 nung tongteprateptsü metetdaktsür.
*****
The Nokinketer 