2nd Dec nungi Mkg mozüki lenmang nung gari noktangtsü

Ward pezü – Penli, Majakong, Artang aser Lijaba Lijen lanur telungjem-i Mokokchung mozüki (IMDH) lenmang kanga majungba agi ibaji anogo trok tashi nung mapa tenzüktsü asoshi sorkar bangdak nem 24^th Nov, 2022 nüto tezüluba ka agüja anogo 6 nü züngzüktsü, aji saka, tanü tashi sorkar nungi telangzüba kecha makaba ajanga kiyong 4 lanurtemi iba lenmang noktaktsü telemtetba agiogo.

Anogo 6 ji 29^th Nov, 2022 nü tembangogo, aji saka, sorkar nungi telangzüba kecha maka, anungji, 2^nd Dec, 2022 nungi tenzüka Mokokchung police point – Sewak junction (Luke Sasong road) tashi gari ajak notangtsü lemtetogo, ta kiyong pezü nungi iba maparen achayangtsü asoshi tentetba core committee, mendenbuba, Sb. Lanulemba Longchar-i Majakong Ward Community Hall nung osangbener senden ka nung jembidang metetdaktsü.

              Iba telemtetba ya kiyong 4 core committee senden 29^th Nov, 2022 nü Majakong Ward Community Hall nung amendang lemtet, ta paisa metetdaktsü.

              “Onoki agütsüba anogoji tanü tembangogo, aji saka, tanü tashi nung sorkar nungi telangzüba kecha maka, anungji, 2^nd Dec, 2022 nungi IMDH lenmang nung gari ajak noktangtsü”, ta pai ashi. “1^st Dec ya Statehood anguba anogo asünung onoki akhüm agüja iba anogo metangshir, saka 2^nd Dec nungi gari noktang maparenji tenzüktsü aser telangzüba tejangja ka mangu tashi maneni aotsü”, ta paisa shisem.

              2^nd Dec, 2022 anepdang 6:00 ako nungi tenzüka aonung 6:00 ako tashi mozüki lenmangji noktangtsü. Rongdak nungdak (emergency) kar dak alaka gari kata mesenzüdaktsütsü, ta paisa metetdaktsü.

              “IMDH lenmang ya joko küm 6-7 tashi meyanglushir. Mulungtet telok balalai dang terara yanglushia aru. Yangi nüburtem tesenzü majung aser talisa shirangertem tebangi meshitetba timtem ajurudar”, ta ashi. “Ya ozü kiyong 4 atema dang masü, iba lenmang nung Mokokchung district den kidanger district ana asem tashi jajar, aji oda, sorkar nungi telangzüba tajung ka mangu tashi maneni noktaktsü, anungji, nüburtemi amaliteptsü aser arema atatsü mepishir”, ta paisa metetdaktsü.               Mozüki lenmang dak sentakba nung tanü tashi kija/kibong aser lokti balalai nungita aser yaritepa aruba asoshi core committee mendenbubaisa pelaba lemsatep.  

*****