Mokokchung mozüki (IMDH) lenmang yanglushiba mapa tenzüktsü asoshi 2nd Dec, 2022 nungi zünga anogo 14 mapang agütsür, ta Ward Pezü (4) – Penli, Majakong, Artang aser Lijaba Lijen Core Committee-i Mokokchung Deputy Commissioner ajanga Urban Development and Municipal Affairs, Advisor dangi tezüluba ka 2nd Dec, 2022 nü Mokokchung D.C nem amoktsüogo.
2nd Dec, 2022 nungi tenzüka ward pezü Core Committee-i mozüki lenmangji noktangtsü sentong ajak renemer liasü. Aji saka, Mokokchung D.C, Shashank Pratap Singh IAS-i 30th Nov. 2022 nü Police Point nungi IMDH ajanga Artang junction lenmang atema sorkari sen teperi Urban Development Department dangi yoka lir (release süogo), ta tezüluba nung agütsü.
Aji oda, Dept of Urban Development kübok Engineering Wing nung official maparen teinyaktsü alibatem ajak temer mapaji tenzüktsü, ta Mokokchung DC-i Ward 4 Chairman dangi tezüluba nung aruba ajanga onoki iba chitti ji akhümtsübur aser noktangtsü aliba sentongji anogo 14 atsülangtsü lemtet, ta Ward 4 Core Committee-i züluba nungji shia liasü.
“Sorkar teinyaktsü mapa (official procedures) atema anogo 14 nü (ibaji 2nd Dec nungi 15th Dec, 2022 tashi) mapang temloktsütsü, Ward 4 Core Committee-i telemtetba agiogo. Iba tetsüngtaji official mapa kechisa lir, item ajakji temer tekaratiba nung mapa tenzüktsüla”, ta zülu nungji shia liasü.
“15th December, 2022 tashi nung mapaji metenzükra, onok mulungka nung mera agitsü aser yangji timtem lendong kar danga atalokra, sorkar khu asütsü”, ta Ward 4 – Penli, Majakong, Artang & Lijaba Lijen, Core Committee nung Tayonger, Lanulemba Longchar aser Tezülur, Imtimatsüng nati züluba koba osangzülurtem nema copy lema agütsü, iba nungji shisem.
2nd Dec, 2022 anepdang Ward pezü (4) sanger yimden lenirtemi anir lanurtem Mokokchung Police Point nung adenshia yang nung jagi Mokokchung Deputy Commissioner office tashi yimdong süa tur iba tezüluba ji Mokokchung Deputy Commissioner, Shashank Pratap Singh IAS nem amoktsü.
The Nokinketer 