11 buba Imsütemjen Memorial Table Tennis Tournament yangi Ungma Amphitheatre nung District Planning Officer, Mokokchung, Imlikokba Longkumer-i meraketa tenzüktsüogo. Iba asayamung nung Mokokchung, Kohima, Dimapur aser Zunheboto district-tem nungia densema team 61-i shilem agidar.
Taküm iba asayamung nung asaya telemsa 5 – Men’s Single, Men’s Double, Under 19 Boys & Girls Single, Under 19 Boys & Girls Double aser Veteran 40 + Single-tem lir. Takoker mezüng aser tanabuba jenjang nem senpet sen den kuli kaket agütsütsü renema lir. Iba asayamung tenzüker tanü tashi arudang, taküm shilem asayartem teimtiba lir, ta tayongertemi metetdaktsü.
Mokokchung DPO, Imlikokba-i iba asayamung tenzükja jembidang, tsürabur Imsütemjen bilemteta iba asayamung ayongba ya jangratemtsüka lir, iba asayamung ajanga TT asayar tajung jenti adoktsü imlar, ta ashi.
Asen kidanger Manipur state nungibo Olympic nung shilem agia takok bener arur, item asayartemji reprangdangra, yimdak yimtsüng/tila nungi (grass root) nungi adoka ka sülen ka ta takok nguyonga aturtem lir. Tanü Ungma nung iba ama ayongzüka asayaba ya tarutsü nung yangi nungi asayar tajung adoktsü nükla angur, ta paisa shisem.
Asenok dak sempetbo lir, saka sempet arangshidak sabang peria maka, aji oda, Longtrok Senden Ungma-i achayanga iba ama asayamung ayonga lanur nem maongka agütsüba asoshia paisa pelaba metetdaktsü.
Naga nunger asoshi ngujem aliba asayaji Table Tennis aser Badminton ya lir. Iba asaya nung asenoki dang temulung agütsüra, tangar menepa asayatettsü lenmang sadema lir, kechiyong iba amala asaya nung asenok ama asoajen alir aikati junga asayateter, ta paisa ajungshia liasü.
Iba sentong nung Mokokchung District Table Tennis Association (MDTTA) Tir, Ali Walling aser Longtrok Senden Ungma tir, Takamanen natia mapang tatsütsü agia tayongzükba o den tepela o lemsatep. Iba asayamung ya 13th Dec, 2022 nü Ungma Village Council Chairman, R. Nungshilepden Jamir ajanga shibangtsütsü sentong renema lir.
The Nokinketer 