‘Aor Kilung Oset (Indigenous Household Craft of the Ao Nagas)’ ta sür Ao Kaketshir Mungdang-i adokba kaket ka Jan 16 nü taoba AKM tir, Ao Literature nung Governor Award angur aser Padma Shri T. Senka Ao-i AKM conference nung meraketa sayatsüogo.
Pai iba kaket sayaba sentong nung jembidang, AKM-i iba ama alakteta school tashi nung amshitettsüsa kaket adoktetba ya ibai mezüngbuba asütsü aser ibai mera tasen ka lir, ta AKM ketdangsürtem dang pelaba den ano Ao lima anguba naro, konger, Ao kin sobusolemtsü aser ano aika lir, itemji tarutsü lanu putu atema kaket küma rizünga yutsütsü ajungshia liasü.
‘Aor Kilung Oset’ kaket nung alibatem tanü mamshiba aika lir, saka tsüraburi amshiba osettsüset shia nungji tetezü lir, anungji, nüngjakojatem wazüka ayutsübaji tongtibang lir, ta pai ashi. “Akhi tsüraburi amshiba osettemji tanü amshiang-tamshi, saka o jibo rizünga ayutsü nungdaker, kechiyong item o nungji shisa tarok (philosophy) lir”, ta paisa shisem.
Aor atema meshi aser atepji kanga tongtibang kechiyong ibai mezüng riju aser temeshi nükmen lir, yangi tapu aika angazüker/sayur. Tanü Ao oshi sama-a aoba ya atep nung Ao oshi mejembiba agi lir, ta pai kuli kar atishia ashi. Tanü Aor aikati kaket mezüluba ya talisa kaket zülurtem dang sen achiba ajanga lir, iba yagi Aor kaketkeno renlokba nung tetsükdaktsü ajuruba ka lir, anungji, “iba mulungsentsü yabo melenshitsüla”, ta paisa shisem.
Iba kaket ya North East Zone Cultural Centre, Ministry of Culture, GoI-i senotsü teperi teyari agüja Heritage Publishing House nung menüng. Iba kaket nung yimozülurtemji; tesayur Dr. Lanurenla, tesayur P. Talitemsü, tesayur Repabenla, administrator Sentilong Ozüküm, osangzülur Sashimeren, Ao Milen yimozülur Akangnungsang aser Dobashi Imolangba parnok ketdangsüba nung züluba lir.
Iba kaket ya tongtibangsa AKM 68 buba inti mungdang Khar nung alidang, Ao oshi wazüka aser rendaktsütsü asoshi küm 10 ranglok mapatong balala inyaktsü bangzüng ka renem. Ibaji mapa küma AKM-i “Aor Kilung Oset” dak sentakba nung tetoktepba ka ayong aser yangji AKM kübok unit 18-i shilem agi. Item unit-temi shilem agiba nungi nungdakbatem agiteta/bendena teti atema rizünga yutsütsü nükjidong nung adokba lir. Iba tetoktepba nung tetendangertemjia iba kaket yimozülurtem dang liasü.
Iba kaket tobur junga adoktettsüsa NEZCC-i sen teperi agütsüba den shirnokisa lenmang balala ajanga shilem tajung agiogo, parnok ajak dang pelaba AKM tir, Nungdokyanger Ao aser AKM Sobaliba Zülur, Longpozem Jamiri metetdaktsü.
Iba kaket nung teratettemji English agia meyipa lir aser iba meyipba maparenji Fazl Ali College Language Translation Centre-i inyakba lir. Iba kaket nung shilem pezüsü lemsar angutsü – mezüngbuba nung yong & arr osettem, tanabuba nung süng osettem, tasembuba nung Merang/Ali/lung osettem aser pezübubaji temeyoktep osettem.
Aor kilung osettemji noksa den kechi agi yanglur aser yangluyim dena shia angutsü. Iba kaket ya 69 buba AKM inti mungdang Akhoya yimdak January 18-20 amungtsü lir, idangji ayoktsü, ta AKM ketdangpurtemi metetdaktsü.
The Nokinketer 