~ Rev. Dr. Meyu Changkiri

BJP asoshi taruba küm 2024 India General Election ya kanga tongtibang kechiaser sangküm RSS küm 100 ajunger.  Sangküm Lok Sabha election temer takok ngura India ya Hindu Rasthra sangdongtsü nükjidong nükla nung mapadong ajak inyaka aoba mapang ka. Joko India nung Dalit aser Muslim na second class amai dang maparen ajak nung amshiba angur. Tat. agi, Dalit Khristan aser Muslim dalit nembo reservation magütsür.  India nung Muslim o Khristan na meyokteper 20% shi süaka, Modi aniba Govt. nung Muslim nunger Cabinet nung ka dang (Khristanbo mali). India ajonga nung Muslim nunger Governor ka dang, Commission balala nung Chairman keta mali ta kümogo. Tongtibang tekolak menden ajak Hindu nunger meyong kümogo.  Muslim aser Khristan nütsüng mezüindaktsütsü ozüng tesashi aika yanglua rishikangshia arudagi. Khristmas mapang Chhattisgarh nung Khristan dak koma benshi asenok ajaki meteta lir. Tongmelang agi yamai atalok:

RSS tesayuba dak amanger Hindu fundamentalist teloki December 9, 2022 nungi tenzüka Narayanpur aser Kondagaon districts Chhattisgarh nung Khristan aika tashiyim agi Hindu kümdaktsütsü merang. Iba ya kanga dang junga asameyanger inyakba mapa ka ta The South Asia Forum for Freedom of Religion or Belief (SAFFORB) kuli agütsür. Parnoki  sangdongba agi Khristantem Adivasi (tribal) Hindu kümdaktsütsü mapadong balala inyaka arur, December 18, 2022, Narayanpur district nung yimtsüng 18, aser Kondagaon district nung yimtsüng 15 nungi Khristantem aridok.  Shirnoksa Hindu masü, parnok yimtsüng toktsür aotsü ozüng agütsü. Aser Khristan aika dak süngtem aser merang amshia azük.  Karbo  tapopang tashi sükdanga azük aser nisung metsü (20) tema kanga mejungi yirur hospitali anir ao. Parnok tanü tashi hospital nung lir. Khristantem aika tesem balalai jenshia ao. Shirnok meyipa aruner, Khristan yimsü indoker Hindu akümtsüla ta ozüng agütsü aser tepsettsü ta tashi amokmeren.  The Centre for Study of Society and Secularism aser United Christian Forum fact finding bushirtemi ashiba agi Mr. Manglu Koram aser Madamnar yimtak nungi Khristan kibong 21, Hindu temple kati tashiyim agi anir oa, Hindu putiri puja süa Hindu kümdaktsü ta ashi.  Parnok ket nungi Temeshi Laishiba razüka bener ao. Yamaji kibong 18 tashi, yim balala nungi, tashiyim agi Hindu kümdaktsü. Khristan pur rishikangshi mapang tetsür temang mazüngi alirtem, temang nung mokokminer aser tantsür-tambur daka züka merenshi.  Yamaji arur, January 2, 2023 nung Narayanpur nung Catholic Church ka amak. Ibaji nokdangdang, District Superintendent of Police kolak yiruba aser pai aniba sepaitem kar yiruba osang aser noksa nguogo.  

District Administration dang Khristan amaktsü renemba osang metetdakjaka tenük amur yutsü. December 9, 2022 nungi  tenzüka Khristan rishikangshiaka FIR asüba magizük. Temrugaon nung Khristan asem dak police 10-15 jakdang zükaka menokdang, aser FIR file masü. District Administration aser Police teka amteper Hindu fundamentalist den inyaker asü nung Khristan alitsü mejungi akümba lima ka kümogo. Yamaji India tesem balala nung anogo shi amai ataloka arur.

Iba ama India nung minority rishikangshidang, Nagaland kong BJP alliance lir, parnoki ola adoktettsü tim. Saka küm pungu tsüngda nung BJP asangba dak alaka, minority dak kechi ataloker iba anema ola mali. BJP lenir karibo India nung minority rishikangshi mali, onoki yamaji inyaktsü memelatsü ta election campaign nung jembiba kisüng jagi mepiritsü. BJP mapadong anemtsüla. Anungji taruba ita Nagaland election aser 2024 Lok Sabha election nung tamangeri kanga dang sarasadema shilem agitsü mapang tongogo.

*****