KOBA PARTY ASER SHIBA SHIMTSÜ

~Rev. Ayu, Pastor

Kobala party ka, kobala lenir ka shimtsü iba mapangji tang ya lir. Tesayur Rev. Dr. Wati Longchari yamai züluba ka züngshi, “You throw the meat in any direction – North, South, East and West– the stray dogs in the street jump that side and fight each other. They will go in any direction. They do not think about their future; they don’t even think about their siblings…” Tongmelang agi yamai meyipdi, “Anüdoklen, Anüolen, Anüdoklen tip, Anüolen tip leni nai shi yokang. Kibur maliba yimdong nung senzüba azü jagi ilen jagi pungmesoa aotsü aser ngutepa shi ji raktepteptsü. Parnoki tarutsü indang mebilemer, parnoki pei techanu atemaka mebilemer…”

Yimdong Zü kibur mali nung endokinra achitsüba dak alema chiyungtsü mapang shitak nung mangur. Yaseta aliba azü atema tongtibangji (principle) shi telong tuluba nguzüktsübaji dang lir. Parnok asoshi tarutsü atema kecha tebilemtsü mali, saka tanü tepok asünger asü masü ta asübaji dang lir. Asenok rongsenren nüchiso mangu tashi aser libaliro (lifestyle) memelenshi tashi shiruru amai dang alitsü südi. Sen nem anishitaktsüba political party, party worker, arogo, lokti tentet aika adokogo. Nagaland nung election mapang shi telong tuluba raktepba mapang tongogo. Naga nunger political ideology ajungaji Delhi nungi koda sür sen teimba angutsü ta asübaji dang amai ajiteter. Kasaji party workera koda sür telok balala tenteta vote anaben, asemben, pezüben ayoktsü ta asüba nükjidong dang angur. Yamai dang inyak nung Naga lima tejakleni odi ma?

India ya shilu aikati akümba yimli ka lir. Shilu aika, sobaliba-tamangba yimsü, oshi aika aliba ya Teyanglur Tsüngremtemoatsü aser ajak akhüm tsübutsüla ta agizüktetba secular party ka shimtsü nüngdak. RSSi kümtetba BJP teloki secular India indang mejembir, saka koda Hindu Rasthra yangertsü aji dang jembir. Muslim, Christian telok anogo shi rishikangshir, tenla ki rongdoktsür, sarasadema lia azükba, aser tanü anti-conversion law state 9 nung agizüka benshir, India nung Khristan telok balala foreign account merijang ka shibangtsüogo; missionarytem jubilee mapang India semdangi arunera visa magütsüba arogo nung lenitemi ajuruogo. Parliament nung asemben tashi anti-conversion ozüng benoktsü merangogo aser ano merangdaki ta metet. Naga nunger dak matalokerji kecha masüar ta bilema masü,saka India rangpen nükla nung jembitsüla. BJP-i Hindu yimsüyimpong nung India arakmoka ayutsü meranger aser iba yagi tarutsü nung asen chir, semchir jenjang tamajungbai yoktsü ta nükla nung jembitsüla. BJP ya communal party ka ta Khristan ajaki shitettsüba mapangji tang ya lir.

BJP nem yimsü südaktsü nung dang terenlok angutsü ta jembiba ya kenyongi aitsütsüla. Ajaki metet, BJP yimsüsüba arur India nung unemployment tali, India nunger sen jenjang ajema akümba (1 US dollar@ Rs. 82 kümogo), aser takar-sensaker tali shisanga akümba tenük kuli.  Nagaland nung BJP-NDPP yimsüsüba mapang Naga nunger terenlok asoshi kechi inyakteta ali? Kohima aser Dimapur nung mapa kar inyakba dak alaka Nagaland ajunga senzüka yuja lir. Tanü ENPO teloki Frontier Nagaland state akhangba kuli kaji, tang teinyakdak government tashi maitba, lokti ajunga asoshi terenlok mapa meinyaktetba ajanga lir. India nung Nagaland ya corruption nung No.1, health, lokti terenlok ajak nung tamajungtiba state ta sangdongogo. Tzükong aika, town sector balala lenmang-a nüburtemi sen sarutepa yanglua arudagi. Ruling party yimtsüng kar nung community hall mesüra black topping yanglutsüba nungji temulung sür alitsüba masü. Nagaland nung lanur asoshi mapa nüngdak, lenmang tajung nüngdak, electric nüngdak, network tajung nüngdak, tzü nüngdak, industry nüngdak, medical college nüngdak, hospital tajung aser kaket rüju tajung nüngdak. Itemji inyakteta lir asü masü? High court, stadium, medical college (Kma) asoshi senbo peria agütsü, saka corruption ajanga merenemtet yua lir. Ochimashi ajanga Nagaland nung development mapa Congress, NPF aser NDPP-BJP yimsüsüba mapang meinyaktet. Kecha ochishir yimsüsür asenoki meshimtet ta nütsüng shiai asüngdangtsüla. Asenoki ochishir aser lokti meimer masü, sen shimba ajanga tanü Nagaland teküboktiba jenjang nung lir. Party-i masü ochishir aser lokti meimeri dang terenlok bener arutet ta kuli sayur.

Osang kar nung züngshiba agi, tang alima nung Yimdong Zü (Stray Dogs) million 62 shi lir, item rongnung India lima 35-40 million lir. Tetezü Yimdong zü ya India lima teimtiba. Lenisüba tsütsü India lima kanga majungba angur, item rongnung asen Naga nunger tamajungba ano shidi süra asen Aortem tamajungtiba. Yimdong nung senzüba azü ama senzür yimden lenir aser party worker nem manishidaktsüli. Nagaland tejakleni odaktsütsü atema ajak khuret. Ne voteji kanga senti. Ochishir, lokti meimer, mangdang akar shimdi. Sen dak rangloker party meshimli.

Laishibai ashir, Isaiah 29: 9-10.

“⁹Nenok mangmangtepang, aser süngmangtepang, nenok sasa tenük pokang, aser tenük poker liang, parnok mesepogo, saka yi agi masü, parnok mangazür saka mejemtzü agi masü. ¹⁰Kechiyong Kibubai nenok madak sümanga amua aotsü tanela meküploktsü, aser ainkartem, nenok tenük shibangja lir, mangdang angur nenok tekolak pai nembangja lir.”

Asen Naga nungeri Tsüngrem sentoker Rongsen aser Konang bushi nung Yirusalem nunger ama Tsüngremi asenok merenshidagi. Tangatettsü tim mangateter, tangutsü tim mangur, teratettsü tim merateteter. Asenok kopika yamai okronga alitsü?  Arung temulung meyipa Tsüngrem dangi odi. Arung ochi shidi. Arung yanglushidi. Arung Yimdong Zü ama melili.

*****