~Dr. Imtisangba Longchar

Naga nunger politician aser party worker-tem BJP ticket hon amai raktepba mapang ka lir.  Parnok ola angadang nung tongtibang kuli kar:

(a) Naga nunger teimbai BJP aginür/meimer

(b) Modi-Amit Shah leadership ajungba agi

(c) Development program sentong ajungba agi

(e) BJP aru nung dang Assam, AP, etc ama renloka aotsü

(f) Nagaland resources kecha mali, Centre nung aliba Govt. den sentaktepa ali nung dang development sen peria arutsü, etc.

Aji oda süaka, lenir shingaia BJP ideology, manifesto ajungba agi ticket bushir tabo tasü itta ashiba mangashi. Naga nungeri BJP nungi sen imlar dangashi, ideology-bo magizükteter ta sayur.

Saka tamanger ola, citizen ka shibai alima yanglutsü jangrar parnok olaji political party kisüngi masü, saka ochi shia inyakba ajanga dang lokti dangi terenlok bener arutsür ta noktaktsüla.  Sen aser pei ajungtsü dang bilemba leniri yimsü asüba agi Nagalang worst performing state ta sangdongogo.India nung tongti BJP party lenirtemi zero tolerance against corruption ta aiben jembiba angur, saka Nagaland nung NDPP-BJP corruption inyakbabo aiben ola madoki yutsüba angur.  Nagaland nung unemployment problem, electric city, lenmang majungba, medical college kata maka, project ajak half-done or just 10%  dang inyakba angur. Senbo ajak aruradoker, saka mapabo matem ta asübaji “corruption” ajanga lir. Ya BJP-NDPP alliance lenirtem ochimashi mapa ajanga lir ta metetdi.  Corruption ajanga BJP-NDPP candidate ajak amai crorepatti kümogo ta Morung Express nung sangdongogo aser pei ajungtsü asoshi dang bendenba agi parnnokba crorepatti saka development maka. Anungji centre nung aliba BJP Govt. aru nung dang Nagaland development arutsü ta asübaji khenyongi tai. Corruption dang tali akümtsü.  BJP masüba state aika nung government lir aser parnok aikati ochi shisa inyakba ajanga terenlok mapa aika inyakba aoba angur. Anungji BJP-I masü,  saka ochi mapa agi dang terenlok bener arutsü.

Ano tongtibang issue ana jembibaji: (a) Nagaland nung Yi meyokdaktsüba agi ita shia sen crore noklang aika lost asür ta jembir. Yi ya dang Naga nunger revenue angudakjibo asü? Nagaland nungbo factory balala teyanglu ta tenokdangba agüja ali asü? Kechiba tanga factory ochimashi mapang ajanga, tat.agi, paper mill, sugar mill, cement factory, etc. südaktsüba aser item nungjagi revenue lost asüba indangbo mejembir? West Bengal, Tamil Nadu, etc nung factories merijanga 5000 tema lir. Nagaland kechi ajir? Joko Nagaland state ngur küm 60 tashi arur, state own revenue generate mesütettsüsa akümbaji corruption aser mangdang makaba lenir nem mapang talangka anishidaktsüba ajanga lir. Nüburtem tai asü, government deficit kümdaktsüba lenirtem tai lir. New Zealand Prime Ministeri küm tenet tashi inyak aruogo,  kü kolok shisatsü aser sempet ajak agi iba tashi ya dang tongtet, anungji lenir kari inyaktsüla ta nungloktsüba nguogo. Taintemi joko lanurtem nem menden agütsütsüla. Mapa nung retired sür nai kechi inyaktettsü? Lanurtem nem yimli agüjang aser takok asoshi parnok nungitsü mapang tongogo.

MLA/Minister takok ngua inyakogo ta asübaji par constituency nungi Govt. mapai nisung paikati anioktsü ta asübaji lir.  Ya khenyongi tangatetba tai.  Mapa maliyonga Govt. mapai back door ajanga party worker aniokba ajanga Govt. employee onsara akümba agi Nagaland nung development mapa kechia meinyakteter. MLA/Minister-i mapa balala purateta alima ajunga nung inyaka aotsü lenmang sayutetba lenir nungdak, aser alima balala nung tesentaktep yanglutsütetba lenir Naga nungeri nüngdaker. Tanga lima nung nüburtem oa inyakba ajanga state revenue aika anguba angur, tat. agi., Kerala, Gujarat, Philippines, a.a. Anungji tanü education tajung akar, mangdang aser tarutsü lima meimba lenir nüngdak.  Hoi, Aortem, ochimashi aser tashi meimer  lenirtemi sen bener vote alii arutsü, BJP ajanga dang development bener arutsü ta tiyazü ashitsü, arogoi yimden nung shilem magitsüla ta ashitsü, etc. item anemaji asen senti meyongnem amajok nung melaluli ta ayongzüker.

*****