Bharatiya Janata Party ticket anguyonga manguyonga, aruya aliba 14 buba Nagaland Legislative Assembly election nungji aitsü renema lir, ta taoba 26 Aonglenden MLA, Toshipokba-i iba osangbener den jembidang metetdaktsü.
“Aruya aliba election nungji O. Tinu Lkr küna külemi lungjemer noktaktsü lemtetogo”, ta pai ashi. “26 Aonglenden tejakleni bener aotsü nükla nung aser nüburtem taginüba atalokdaktsütsü aser temelenshi bener arutsü asoshi küna ka küma lungjemtsü telemtetba agiogo”, ta paisa shisem. O. Tinu Lkr ya taoba NLA Deputy Speaker, MLA & Advisor, Lt. Imtikumzuk Longkumer tenu lir.
Iba osangbeneri Toshipokba dang, “naia NDPP-BJP 40:20 seat sharing formula ya junger majung ama bilemer?” ta metetnüa asüngdangdang, “menden lemsatepba ya kanga majung, kechiaser tang tensa tia asadangra, BJP kisüngia single majority nguteta sorkar kümtettsü tashi lir, anungji, ibai salatsüla”, ta ashi. Taoba mapang ama masü, “Nagaland nung BJP ya nüburtemi kanga sabuba party ka kümogo, anungji, constituency 60 nung aitsüsa nübu peria lir”, ta paisa shisem.
“Temelenshi kecha mekai 40:20 seat sharing formula nungji dang ora, Nagaland nung BJP sama-a aotsü menua mali, anungji, tang nüburtemi BJP sabuba mapang iba maongkaji agitsüla aser nübur ola angadangtsüla”, ta Toshipokbai ashi.
2022 October nung BJP nung dener inyaka arudang, 26 Aonglenden A/C nung voters 13000 shi lir, aser item rongnung voters 7000 shi bo BJP nung tenüng züluokogo, aji oda, “BJP-i takoker candidate ka bushir asünungbo, takok angutsübaji tejangja, anungji, 26 Aonglenden AC nung ticket ji kü nem agütsütsü tim”, ta paisa tebilemba kar lemsatep.
Iba osangbenerisa pa dang “kechi tangatetba nung na BJP nung aden?”, ta asüngdangdang, BJP-i aniba sorkar yagi grass root nüburtem atema sentong tajung aika tenzükba ya jangratemtsüka lir aser talisa India Prime Minister Modi-i North-East atema temulung kanga agütsüba angur, iyongji iba party dak tarutsü nükla lir, ta ajiteta BJP nung aden, ta pai langzü.
Nübur tenzüktsü tejangraba nung Aonglenden A/C nung joko 4-5 tashi election nung shilem agia arur saka MLA term kata abensaa meinyakdang. “Aonglenden nüburtem den joko küm talangka lisema arur asünung, constituency tiaji kanga junga meteta lir, anungji, constituency sanger atema mangdang tulu lir”, ta ashi.
“Ni election-i aiba ya takar-tulur kümnüba mesüra konang aginüba agi masü, saka nübur tenzüktsü tejangraba tulu nung noktaktsü mulungtetogo, anungji, nüburtemi maneni sarasadema atadaktsünür”, ta paisa mepishia metetdaktsü.
Taoba MLA, Toshipokba ya 2011 by-election nung pai taoba Nagaland CM & Governor, Dr. SC Jamir tsükdaktsü aser MLA ita 18 dang inyak. Aji sür, 2013 & 2018 nung toktep, saka madok. 2018 nung tia maka ajurua Imtikümzük iba lima nungi pila, iyongji 2019 küm by-election agiba Sharingain Longkumer (NDPP)-i Alemjongshi Longkumer (INC) madak takok angu.
(Source: Tir Yimyim)
*****
The Nokinketer 