(From Clean Election to Clean Voters: A Christ-centered voter)

~ Tiatoshi Longkümer, Kohima

Okila:

Joko state election term asem shi (about 15 years) clean election indang NBCC/ABAM-i anir kanga jembia arudagi. Aser asenok ajaki metet, temelenshiba karbosa iba clean election campaign ajanga bener arutsüogo ta reprangteter. Iba asoshi Tsüngrem tenung asanger. Aser ano aika dang inyaktsü nungdaka lir.

Asenoki metettsüba kaji, Clean election campaign ya State Assembly election arudang agitsü atema dang jembir masü, saka clean election ya kin-kidong lenir shimba nungi tenzüker, president of India election tashi nung amshitsü atema iba ya tentetba lir.

Clean election indang jembiba ya tanga system ka, foreign lima kar nungi apua bener arua inyaktsüba jembirba masü, saka India lima nung Indian constitution kübok mezüng General Election tenzükba (1951 October 25 nungi 21 Feb’ 1952 ) yangji zülua aliba temzüng tongtipangtem (provisions) ano tali metsünga reta amshitsü indang jembirba lir. Hau, sobaliba balala (cultural issue)asübayong Indian election systemji karbo Naga nunger sobaliba inyakyim den meputepia alitsü akok. Saka Indian election system nung kechisa teinyaktsü zülua lir, ajakji kanga dang tajung aser merüka aser ochi nung lenir shimtsü asoshi shisashir tajungtemi zülua yutsüba lir. Aji agi ang, tanüa arogotemi item provisions tajungtemji shimteta nübur ajaki metsünga reta amshitsü ayonger. Atangji, ni shinübaji,  Indian Election System ya majungba agi nisung raksatsür masü, saka voters majungba agi election systemji raksatsür aser menentsür.

Anungji, kü tangatetba nungbo tanü asenok asoshi tongtipangtibaji, election system ya merüktettsüba dang nungibo, voter-tem ya merüktettsüba ang kanga tongtipangba ta bilemer.Na aser ni ya Clean voters kümra electionji clean dang kümadoktsü. Saka clean election indang komar ka jembiaka, voter-tem clean mekümra, systemji merüktettsü kanga tasak asütsü. Anungji tang nungi shirbo, clean election dang masü saka clean voters atema ang tali jembitsüla.

Kechi agi asenok ya Clean voters mekümteter or kechi agi dirty voters kümdaktsür?

Laishibai ashir, alima tasoba yimya agi meimchir shiaji temenen nung aso aser temenen taküm ka-ka. (By nature we are corrupted being).  T. Ken 51: 5 nung Dawid-i ashir, “atangji ni temenen nung yanglu, temenen nung kütsüi ni aben.”

Ano Rom 3: 23 nung, “Kechiaser ajaki temenen mena aser Tsüngremer sentsüwangshi matong.”

Lai o ajanga angateter, Adam aser Eve nungi tenzüker meimchir ajak temenen nung tsük nung,  nisung mulungjagi aruba ajak agi temenen mapa inyaktsü dang jangrar ta Lipok 6: 5 & 6 nungji angutsü.

“Kodang meimchiri tekülak tamajung mapatem inyakba aser parnok mulung nung teti tamajung dang bilemer ta Kibubai angu, pai alima nung meimchir yangluba atema jashi aser pa temulung mepelai aküm.”

Asenoki ya rajema yudi, Tsüngremi meimchir temenen keter yangluba masü. Pai Adam aser Eve yangludang “ya kanga tajung” ta shia temeshiba nung yanglu. Saka Pa mesükba nung yangluba taküm dangi kodang temenen ait, iba nung jagi tenzüker asen takümji teraksaba taküm aser tasütsüba taküm kümadok. Aji oda, tetsüi asoba taküm shiaji Khrista magizük tashi, tanela nung tanaben maso tashi alima temenen mapa dang inyaknür, aser memerük mapa inyaktsü ang  jangraar.  Rom 7: 15  Pauli ashir, “Kechiyong ni kechi inyaker aji ni mangateter, kechiyong ni kechi inyaknür aji ni meinyaker, saka kechi ni sempar aji ni inyakadoker.” Ano tk. 18 –20  “Kechiyong kü dak ali shi taküm nung kecha tajung mali ta ni metet. Kechiyong koba shitak iba atema ni mulungtsü akok, saka ibaji ni inyaktsü makoker. Kechiyong ni kechi tajung inyaktsü mulunger aji meinyaker, saka kechi tamajung inyaktsü ni memulunger aji ni inyaker. saka kechi ni memulunger aji ni inyakra, ibaji ni masü saka kü dak aliba temeneni inyaker.”

Iba lai yagi kechi shinür ta süra, Yisu Khrista ne takümi aser kü takümi mait tashi, mesüra na aser ni tanaben asoba taküm ka-ka maküm tashi, asenoki temenen mapa mebilemi aser meinyaki melitet. Kechi komar ka alima ozüng tesashi liaka, komar ka security arrangement junga agiaka, kobika campaign südir süaka, Khristar tanela tazüokba mali tashi temenen mapatem meimchiri toktsütsü makok. Yamaji, kü tangatetba nungbo, voters taküm nung Tsüngrem tangatetba mali tashi clean election takok mongutet.

 Khristan lima ka nung clean election takok angutsü asoshi tongtipangtiba tashiji, Khristaji dang lir.Filipi 4: 13 nung ashir, “Khrista shibai ni tashi itdaktsür pa ajanga ni ajak inyaktsü akoker.”  Tamanger teloki mesüra arogoi Khrista teyongtsü mekümdaktsüi, alima merüktettsü mesüra taküm merüktettsü jembiba ajakji amajok dang asütsü. Aji oda, clean election mapa ya Khrista jangja –janga akaba voter-tem ajanga dang koktettsü.

Tanela nung tanaben sor Khrista akaba takümtemi election temzüngi melaba ama shilem agira, clean election campaignsa maoyonga odang clean dang süadoktsü, merüktetadoktsü. Kechiaser system jagi raksatsür masü, saka voter-tem dak aliba temenen shisatsü jagi systemji raksatsür, manipulate asür, misused asür.

Anungji, temelenshiba takümi election nung shilem agira, temelenshiba lenir shimtettsü aser alima tejaklen aotsü. Aji oda, NBCC/ABAM/KABA süang, clean election aginüra, arogopur shia takümji tanaben asoba taküm, tekümtet tejangja kadaktsüa inyaktsübaji kangsa tongtipangba lir.

Asenok aikati ajangshia lir,Khrista maka dang tamalen election nung chiajemer polling booth coup süa inyaker aser sen lemaa senzükertem aika parnoki Khrista ajurur külenbo clean election campaign lenirtem kümer aika lir. Parnok ya Clean election seminary ka nung adenba agi melenshiba masü, saka Yisu ajuruba ajanga melenshidaktsüba lir. Khrista ajanga dang taküm aser alimaji melenshidaktsür ashi, alima ozüng agi azüokbaji  khen asoshi dang lir.

Rom 12: 1 – 2 nungji ashir, ne shi temangji temeshi aser Tsüngremi agizüktettsüsa tarungba tenla ka ama tenlaang. Ibaji nenok tanela tekülemba lir.

Kechiba Tsüngremi asen shi-temang ya temeshiba aser Pai agizüktettsüsa yuang ta ashir? Kechiyong 1 Kor. 3: 16 nung ashir, “Nenok Tsüngrem tenlaki, aser Tsüngrem tanela nenok dak alir ta nenoki memetet no? …kechiyong Tsüngrem tenlaki temeshi aser ibaji nenok lir.”

Kibubai agizüktettsüba taküm aser temangji Pa aliba takümbaji dang lir. Pa makai temeshiba maka, aser tanela temeshi ajanga dang asen temangji Tsüngrem tenla ki kümdaktsür. Aji oda, ne temang taküm jagi alima nung alidang koda alir iba jagi ne tarutsü taküm jenjang lemtettsü.

T. ken 24: 4& 5 – “Shiba teka nung ar mali aser temulung temerük lir, shiba dak tiyazü mulungsentsü mali, mesüra tekülak agi azüngashi masür. Pai Kibuba nungi temoatsü agizüktsü, aser pa Tsüngrem Kibuba nungi temeshiba angutsü.”

Atangji, ne teka, ne mulungsentsü aser ne mulungjang amshia alima lenir shimtsü aiben dang ne dangi arur aser arutsü. Nai-a ne teka koma amshir (as a bonafide voter)? Ne teka temerük agi dang asen lenir shimba nung shilem agia arudar ma? Ne teka tim masüba sen, oset, achi-ajemba mesüra azü aketba teka masü ama? Tsüngrem O jagi ashir, “shiba teka nung ar mali pai Kibuba nungi temoatsü agizüktsü.”

Ne temulungjanga temerük lir ma? Election ajanga lenir shimba nung ne mulungjang temerük agi shilem agidar ma? Election nung shilem agiba ya temenen masü. Saka asen temulungjang aser mulungsentsü tiyazü khuli bener shilem agira, mesüra tekülakoktsüba shisatsü aser temenen tasatem bener shilem agiba ajanga electionji menendaktsür.Aser iba jagi Tsüngrem tenlaki raksatsür. Aser Tsüngrem Temeshi Tanela asenok nungi piladaktsür.  Tsüngrem O-i ashir, “Nisung kari Tsüngrem tenalki raksara, Tsüngremi pa raksatsü.” (1 Kor. 3: 17).

Ni bilemer, asen naga nungertem aikati pei vote, memeshiba teka nung bener, tekülak mulungsentsü aser tiyazü mulungjang bener election nung shilem agia aru nung jentipur taküm Tsüngremi raksatsüogo, aser asen lima dena raksaogo. Kechiaser Tsüngrem o-bo taküm aser ataloktsübasa.

Otem:

Tang nungi shir danga asenoki taküm tajungba ka, aser alima tajungba ka Kibuba nungi aginüra, asenok voter shiai Election System merüktettsü atema pei taküm merükteta aser meshiteta election nung shilem agitsü atema Kibuba tali bushidi.

Alima oshi aser shisatsü dang bener alima melenshidaktsütsü merangba jagi kodanga Tsüngremer lima meyanglushitettsü. Rom 12: 2 nung ashiba ama, “Iba lima putu yimya den sütepa telima, saka nenok temulung asentenshiba agi nenok taküm yimya melenshidakjang;” NBCC/ABAM/ lim arogotem-a süang, Khrista teyungtsü mesüdaktsüi iba lima putu yimya nung dang Clean election indang jembira kodanga takok mangutsü. Khrista ajanga asentenshidaktsüba mulungsentsü ajanga dang alima nung temelenshi bener arutettsü. Anungji,clean election campaign sendak nung methods aser criteria aika, koba shitak aser koba tai itemji  nai jembia angashitsü, (ajia tim dang). Saka na aser ni voter ka ama, teinyaktsü tulutibaji Tsüngrem dang kü temulung asentenshidakjang ta dang sarasademang. Naga nunger voter shia-i Khrista bener election nung shilem agira, clean election indang methods aika jembia kazüteptsü menungdaktsü.  Kechiaser Khristaji dang asen lima aser nubur asoshi teimla.

*****