Mokokchung nung tzü agi anüngakongba ya ulura, kibong ajaki amato tzü alia agir aser ajemer, tzü ya meimchir asoshi tongtibang nüngdakba ka lir, anungji, Mokokchung town nüburtem tzü agi yamai timmatemtsüsa mapatong kar inyaktsü tebilemba lir, ta Mokokchung Deputy Commissioner tasenba Shashank Pratap Singh IAS den iba osangbeneri sensaksemdang metetdaktsü.
Pai ano temulung agütsütsüba wadang ka lemsatepdang, Mokokchung nung merükmejuba tsütsü teinyaktsü aika lir, merükmejuba ya nisung shiai pei khuret ama bilema pei aliba ki temeket merükba den jana bendenba yimya ya bendangtetra, iba jagi merükmejuba tsütsü khuret tulu pongbaloktsü, ta pai ashi. Sorkar ket nung aliba nüngdakbatem (resources)-ji kanga apara, anungji, sorkar dak dang nendaka meli-i merükmejuba ya arok shilem ta ajaki angatettsüla, ta paisa shisem.
“Mokokchung ya ni asoshi yimti tasen masü, kechiyong ni Mokokchung ADC & MMC Administrator ka ama 2020 nungi inyaka arudang mulungtet telok balala den nüburtemi maparen ajak nung nungitta aser amalitepa arudar, tang ya khuret tuluba benloker asünung, nübur nüngdak atalokdaktsütsüsa ano kasa tangatetba nung maneni yaridaktsünür”, ta paisa nüburtem dang mepishia metetdaktsü.
Pa taküm aser UPSC nung takok anguba indang tatsü ka:
Arishi küm 35 Shashank Pratap Singh IAS ya Uttar Pradesh state nungi Gorakpur district kübok Bharroh yim nungi lir. Pa ya Class 12 tashi par yimdak dang azüng. Iba sülen Gorakpur yimti-i arua B.A graduate asü. Aji sür, Jawaharlal Nehru University (JNU) nungi Political Science M.A aser M. Phil renem. Ano JNU nungisa Ph.D agia Delhi University (DU) nung tesayur inyaka lia 2015 küm UPSC nung takok angu.
Iba osangbeneri Shashank dang ‘na JNU nung research agia DU nung tesayur teinyaka lia UPSC koma ajangzüktet?’ ta metetnüa asüngdangdang, “ni atema item ajakji takok angutsü atema maparen ka dang liasü aser item ajakji ni asoshi temoatsü ka ama dang agir”, ta pai ashi. “Civil service inyaktsübaji ni asoshi mezüngbuba nükjidong liasü, anungji, tanga mapa balala inyakaka ni civil service atema mapang agiteta lesson maneni bushi”, ta paisa shisem.
Pai 2011 nungi UPSC agütsü tenzük, aji oda, küm asem tashi prelims & mains ajangteta interview jenjang tongtet saka tia majung pa bilemba matalok. Saka pezübuba (4th attempt) nungang pa nükjidongji atalok.
Pai ajangshiba nungi o ana lemsatepdang, tatidang balala agütsütsü atema dang masü saka taküm aser mapa ajak nung nisung ka dak “nükjidong” shitak ayuba den “temulungtetba” takang alitsüla, kechiyong itemji lira tatidang tapu balala ajiruaka paitoktet. Merang nungbo jenjang tulu ajangzüktettsüsa asenok dak tashi lir saka aiben aikati yakta tezütangatoker, ta paisa kuli kar shisem.
Pa UPSC tatidang atema lesson bushiba lemsatepdang, lesson bushiba yimyaji nisung shia balala, anungji, ghonda balaka lateta mayu saka aiben anogo nung ghonda 3-4 bushi saka tatidang mapangbo ghonda 14-15 tashisa bushia liasü, ta pai ashi. Pa ya prelims aser mains atema coaching class magi saka personality test (interview) atema dang coaching agiba pai lemsatep.
Pa mezüng Nagaland-i arua 2017 küm Kohima D.C office nung probation period liasü, iba sülen Mon nung SDO (C) ita ishika inyak aser CMO office nung deputy secretary küm ka shi inyaker, Aug 2020 nung Mokokchung-i ADC & MMC Administrator aru aser 2022 March ita tatemlen Mokokchung D.C mapa Limawabang Jamir NCS nungi agizük. Pa ya o kangabo mali tesüngjem officer ka lir.
Pa temelen ADC & MMC Administrator ano maru asünung iba mapajia pai dang bena lir. Pa ya Mokokchung atema nübu tasen ka masü, anungji, nüburtemi pa nungi aika imlar aser paia Mokokchung atema pungmang kar lemsatepogo.
(Source: Tir Yimyim)
The Nokinketer 