“TANU ANGATI ANGUBA KECHA MALI”

By Lanu Atsongchanger

Tanü alima kanga dang azen keta ainba tensa ka nung asenok alir asünung, taküm libaliru temaba jenjangi atuba meteter aser angur. Tsürabur nungi angazükba agi, par putu alima tazü aser tongmelang liasü. Anungji, alu ayimtsüji dang par shisatsü agi aru nung “shiri alu tuluba ayimer” mesüra “tsük timba arur” ta asentzü sena aki-alu mapa nung taküm arishi temdaktsü. Par mapang, taka-taiter aser sensaker, makar ta tebendang ajiteta liasü. Maka mait nungji jang-o-tsü tashi apotepa kibong mesüa aruba ajangshia liasü. Aji oda, sensakertem pei tepok aser kibong mesütsü lenmang kanga satemrabo maliasü. Saka kümtem süitema arudang, alima ainba anogoshi asenoki meteter. Asen Naga lima nungbo Kohima aser Dimapur-ji kanga takar lima ta jembia aru saka asen Mokokchung-a joko nüburtem kechisarena nung pi bendang meneba aoba angur aser iba jagi ashir, alimasa ainer aser pei poksüngbosa anakteta liteter, koba tetezü rongsen lenmang bushitsü sadema lir. Kechiba pi nisungi asen lima penzür? Parnokji odangbo arur masü saka ayangdak (earning) tesadema aser ta-a talang angur. Iba jaki asen neburji sensaker aikabo mali ta sayur.

Asen tsürabur mapang mangsa tia nung liasü, yongji temang anebaluba nung, sobusolemtsü nung, achiajemba nung aser taküm libaliru ajak nung rongsenkettsüng (economic life) tsütsülen kangarabo tejakleni moi “tanü poksüng” nung dang rangloker liasü. Saka tanü ibaji khenyongi melenshiatokogo. 1990’s tema nungi shir asortemi alima manger mesangwa dang melenshia ainba ya kangarabo memetettsü südi saka iba jakdang asor shia alima ainba indangji kuli sütettsü. School-i aodang, tanü ama taxi/bus nung amentsüjibo toktsür Km 7/8 tetsüng agi anogoshia school kaket Kg. 5-6 bener naya metsü (20 paisa) sa bener, oli aruli ta senzüba menungraa bilemteter. Item anogotemji tanü anogo den asadangra tetsüngta tulu agi tongdanga lir.

Tsürabur mapang aluyimer timba liasüji, rongsen meindoki pei teka agi züsentetba agi kibong mesüa aru saka tanübo aluyimer 20 – 30 % dang aküm nung nüburtem market nung dang metaloker aliba tensa kümogo, aser market jenjang kechi nung lir asenok ajaki metet aser tenük agi angur. Asen taküm nung angati ajak agi o ya dang liasü saka tanübo iba o tashi alizüker ang jembir. (Mobile/T/phone). Tetsüng agi dang senzüa liasü saka kima ayazükli nungi gari nung amener (totzü/para). Kidang TV angati (Dordashan) repranga liasü saka tanübo cable mesüra satellite TV repranger (cable fee/recharge asür). Angati anguba osettem: azü, sürra aser jara ta yong mechir ki yanglua litep saka tanübo kojal (nail), merang, lisem, lung item amala sen agi alia ki asür. Arem nungi süng bena atsük saka tanü LPG (gas) aser heater amala amshir, mi nung tzü molua ajem saka tanübo light (power) ajanga molur mesüra filter sür ajemer (Bio-pure/aqua guard/mineral water etc…. aser ano aika dang lir.

Iba ama angati anguba kecha maliba putu ka nung asenok alidang, asen tsürabur nungi aruba sobaliba tajung benshitsü kanga tongtibang ta ajiteter. Market nung asen nüngdakba tuluba nungi tilaba tashi angur. Asenoki zübazüba dang kinunger, adianu aser medemer tenyatenko asür mesüra meshimetsür, saka iba nungji nai shiba tenyar/shiba dang meshir, pa/la bo teindokba (expenditure) dena lir. (Tat. Mobile nung jembir, taxi/gari nung orr arur/oset alir yua aliba agütsür, ano aika). Iba nung ya asenok tebilemdangtsü ka lir, aser ibaji asen sobaliba tajung “awashi” ya lir. Iba awashi  nung ya tapu aika dang sentaka lir aser tanü iba “awashiba” yimya ya nisung ka taküm nung kanga tongtibang kümogo. Awashi maliba takümbo, na komaka kaa itaa aser shia meteta liaka, nüburtemi naji jangratema majitsü mesüra naji mezüngoktsü. Laishiba nung ashir “Ne sasa kechisarena nung mapa tajung tatishitsü sayuang”.  Hau! alima nung shinga tabensaba mali saka kati ka den angazüktepa aor. Anungji, asenok ajaki tabensabaji arishia aotsü merangtepdi.