Alima meimchir aser libaliro, tzü-mopong melenshia aodang kodanga memelenshiba Tsüngrem O dak ajemdaker Laishiri aser lokti nung temelenshi adokdaktsütsü jangrartem, lokti balala aser Arogo nung Tsüngremi mulungba ama shilem tajung agitsü asoshi temulunger telok ka “YANGLUSHIDI SENSAKSEM SABANG (YSS)” (Whatsapp Group) tenteta mapang shia shisatokden sensaksem akar. Tang tashi nung takotet laishirtemi anir asen Aor arogo aser loki lenir tajung nübu 253 iba YSS telok nung dena lir. 2021 küm nungi ita nung khen-anaben ZOOM ajanga shisatokden akar. Tsüklai 23, (Feb.) Sangtennü (Tues.) shisatokden nung “NBCC & ABAM Clean Election: Inyaka aruba nung Takok aser Tamakok” indang Rev. Dr. Mar Atsongchanger, Executive Secretary ABAM aser Mr. K. Temjen Jamir, Editor, Tir Yimyim, tenati jembi. Onük jembiri jembir külen o semlok aser lokti o lemtep liasü. Iba sentong Rev. Yapang Mollier, Church & Mission Secretary ABAM aser Mrs. Imtilemla, Asst. Head Mistress, I.B.S. tenati ketang süa agi. Iba shisatokden nung lemsatepba tongtibang kar lemsateper.
O JEMBIRTEMI JEMBIBA TONGTIBANGTEM:
NBCC & ABAM Clean Election Koma inyaka aru
Tsüngremi nisungji temerük aser temeshiba nung yanglu saka meimchiri Tsüngrem anema temenen mena nung temenenpur aküm. Iba temenen nungi meshiteta Tsüngremer sentong nung temeshiba kümdaktsütsü, nisung shia Khristar nütsüng tajung ka ka kümdakja, kuliser tajung ka ka kümdaktsütsübaji Tsüngremi tamanger shia nem nungloktsüba mapa tulutiba lir. Anungji Khrista nütsüng ka ama tamanger shia maparen ajak nung kuliser tajung alitsü nüngdak.
Tanü Naga lima tia asadangdang lokti aser yimden yimsüsübaren teraksa aika agi sünga lir. Iba teraksa ya kong nungi ta shisadangdang item teraksa ya Election dak tera yanga lir ta ajiteter. Naga lima mezüngbuba election nungbo kanga teraksa adokba mali asü, saka tanabuba election nungi teraksaji tenzüka aru. Anungji iba teraksa akoktsü asoshi nüburtem nem tangatetba tajung agütsütsü nungdak ta angateta ABAM aser NBCC-i Clean Election Yimyim ayimtsü 1972 nungi tenzük.
Clean Election yimyim aser maparen ya Party ka noktangtsü asoshi masü mesüra party ka ajangzükdaktsütsü asoshi masü, saka Ochi shia election agitsü atema tesayuba agütsüba lir. Iba yimyim Naga nunger dang masü, India nunger ajak tajangzük aser temelenshi asoshi noktakba yimyim ka lir ta angatetdi.
Clean Election maparen nung tesayuba tongtibangtem:
Vote sen yong mayoktsü
Mapa/tajangzük angutsü mechi vote magütsütsü
Pei vote dak alaka tangar vote magütsütsü
Election Camp meyanglutsü
Senso Candidate meshimtsü
Clean Election atema inyakyim balala inyaka aruba rongnung kar:
Pledge card yanglua tenangzükba agidaktsü
Youth Bike Rally Clean Election Yimyim ayimoktsü
Election sermon yanglua nübürtem nem lema agütsü
Candidate jadena parnok nem pei nükjidong shidakja sarasadem agütsü
Clean Election Sunday amungba den sarasadem yinzü ayongzüka agi
Clean Election ken yanglua iba ken ajanga ochi election atema kuli asü
CD yanglua Clean Election Ministry inyak
Takoker Khristan ka ta sayutsü asoshi election nung ochi shia shilem agitsü temaitsü pei kidang wako temsüng asong
Asen Aortem asoshi Tir Yimyim nung anogo aika Clean Election atema tayongzükba agütsü.
Clean Election ya Arogo tebilemtsü dangbo masü anungji Election Commission-ia shilem tajung agitsüla ta ayimokja liasü.
NBCC & ABAM CLEAN ELECTION: Inyaka Aruba Nung Takok Aser Tamakok
NBCC aser ABAM ajanga Clean Election sentong agiba ya mapang shitak nung nüburtem nem tangatetba agütsütsü merangba mapa lir. Iba mapa inyaka aruba nung takok aser tamakok asadangtsübaji kanga nungdak aser tongtibang kechiyong ibai ajanga tarutsü nung shilem tajungba agitettsü. Clean Election sentong takok aser tamakok asadangtsü atema, (a) tang state government-i lokti terenlok mapatem inyakba jenjang, (b) tatar yimsüsürtem taküm yimya aser jakla aser (c) nüburtem taküm aser kibong tia asadanga shisadangogo, kechiyong Clean Election sentong nükjidongji yimden yimsüsüba (government) tajung ka kümdaktsütsü asoshi lir.
TAKOK ASER TAMAKOK ASADANGBA
Takok:
Atangji, tang Nagaland tatar senden nung amener Aor tatartem jakla yimya (moral integrity) tajung amai repranger aser parnok karibo tatar senden nung shilem kanga junga agiba angur. Iba denji Aor tatartem rongnung yi jemer aser shi azü mazüoki senzüba kangabo mangur. Clean Election takokji aji ka asütsü, kechiyong Clean Election yimyimji Tsüngrem tsübuba aser nüburtem meimba lenir adokdakjang ta ayimba yimyim.
Clean Election ajanga tajungshiba ama tashi angaa pei kidang wako temesüng songa yur, pei tangatetba nung Tsüngrem tenüng nung tenangzükba agir indang indanga vote agütsüba purtem aika liasü. Item rongnungji tashiyim amshiba ajanga tesüiba election-tem aika nung polling station mungudang aser vote agütsüba yimyaa amadoker aliba sensosangertem aika liasü, saka parnokji Clean Election yimyim ajanga taoba election nungbo vote shitak agütsütet. Nisung kari dang tashiyim agi meyongnem agütsüba ajema aküm.
Clean Election ajanga akhi ama party kimen aser Youth Camp memesem, aser tesem kar nungbo candidate-tem common platform kati jadena jembidaktsü. ABAM-ibo candidate ajak Impuri jaoker mapang tatsütsü jembidaktsü aser parnok asoshi ABAM-i sarasadem agütsü. Item jagi tamajung inyaktsüba nungi meteta aser memeteti tuluka nokdangogo.
Clean Election takok asoshi Clean Election Sunday aser sarasadem yinzü sentong maneni agibatem liasü. Item jagi nüburtem nem tangatetbabo apuoktsüogo.
Clean Election sentong ya revolution ka masü, anungji manger sangwa nung tamajung aser meshitak mapatem inyaka aruba ajakji matsüngdoktettsü. Ajisüaka, Clean election mongjenbo mesemtetogo, ronübo sayuogo. Aji mezüngba takok asütsü.
Ano takok kaji, tezü medangi nangzükba ama maneni inyaka aotsü mulungtetba aser tanü lanurtem aikati Clean Election nükjidong angateta akümba ya asütsü. Aji oda, Clean Election sentong takok ngua jangrupet jangrutsü asoshi aputeta yutsüba mimongji aji asütsü.
Tamakok:
Lenir ta takok aser tamakok asadangbaji pai/lai lokti terenlok asoshi kechi inyaker ta asübaji lir. Tatartemi election nung nangzükba ama inyakteta lir mali? Mali ta ajaki shitet. Terenlok inyakbaren aser rongsenren nung nüburtem ajungkettsüsa inyakba aser lokti ajangzüktsüsa gari lenmang, mozü ki aser school kitem tajungba küma inyaktsüba mali. Nüburtem ongzüka achitsüsa süngjang tajung atangba mangur.
Clean Election sentong ajanga nüburtem dang Election nung pei vote sen aser mapayong mayoktsü ajang-ajanga ayimokajaka, taoba election nung toktepertem aika sen crore aika endoka toktepba otsü lir. Iba election sentsü jagi nenneter tadokertemang shisa tebuluba aser madoketemang khuret tuluba ta election nung tokteper aika kanga shisabulu tia nung aliba angur.
Ano tamakok kaji candidate tajung apia masü, saka pei yimer apia senso candidate shimba aser senso mungdangi ashiba mangara vote dena meinokdaktsüba tatalokbatema tesem kar nungbo liasü.
Arogo tsütsü Clean Election tongpang nung tamakok kaji tetsübu aser tarendak agi Khristan anemba yimden telok anema yimyim magütsütet, iba jagi shirnoki Hindu yimsü tsütsü atsünga yimsü asütsü meranger, parnok nempoka aitdaktsüogo. Clean Election ken nung “Khristan yimsü anemba telok” ta aliba tekong dena atentsü arogoi tasü meittet.
Clean election tongpang bilemba aser imlaba ama tashi itta moutetba kuli kaji, arogoi ayongba tongpang ser nung, yimtsüng aser jila aika nung sannüker kija toktsür deacon aser mapangsertemiang candidate-tem dang nungi sen meshia nübo yima jajaba purtema liasü. Iba jagi Clean election sentong menüdong kümdaktsü aser arogo purtem mulung mekoktet.
Tamakok tulutibaji, Clean Election sentong nung tongti shilem agir kati jembia jajaba ama mapa agi shitak inyaka mesayutetba aser election nung tamakok angubaji asütsü.
Political Party aser Candidate:
Tongti o jembiri onük jembir külen onük dak sendakba nung osemlok aser olemtep mapang jembidang, taoba election nung Khristan yimsü (tanga minority religion ajak) anema inyaker party asen limai nungoka aitdaktsübaji asen Naga Khristantem talisa Aor tamakok tulutiba. Ya BJP telok anemer masü, saka BJP agenda koba agi tangar tamangba yimsü aser sobaliba anemer, itemji anema Khristantemi tasü itta nokdaktsü.
Tanabuba nung “ni nüburtemi shimtetjang” ta tangatetba nung masü saka “ni adoktsüla” ta iba tangatetba nung Electioni aier. Anungji pa/la adoktsü asoshi ochimashi mapa inyaka sen talubosa amshia meyongnem alir. Yamaji mesüi, tangatetba tajung nung candidate shiai sen aser tashiyim agi masü, mapa tajung aser pei nübur aser pei lima meimba tanela tajung agi Electioni aitsüla. Tasembuba nung, asen lima jungdaktsünera political party shinga nema küm pungu tema yimsü mesüdaktsütsüla ta asen nüburtem nem angatetdaktsütsüla. Ano retired/voluntary retirement agir Electioni aiba ya yimya tamajung, retired is retired ta tangatetba alitsüla. Parnok government mapa nung alidang ochimashi bendenba sen agi meyongnem aliba yagi alima raksar. Tanü lanur aika tashi temetetba den nübur meimer lir, parnok nem alimaji anidaktsütsüla. Yamaji asü nung dang asen lima aintsü.
Arogo ayak kuliji ochi nung nokdakba aser ochi inyakba ya lir. Ochi o tasü ita mejembitettra aser meinyakra, arogo nungdak maka akümer. Arogo ya alima nung ochi kuli asütsü Tsüngremi jatet. Anungji yimden nung ochimashi mapa, lokti teraksa, rongsen ketsüng maparen balala nung ochi mashi anema tartsüba aser temetongshiba agütsütsübaji arogo kuli aser tenyaba mapa. Meyongnem agütsütsübaji nütsüng shia temeten lir aser iba temetenji shingaia rakzüktsü makok. Saka iba temetenji tashiyim agi rakzüka aruogo aser karibo yoka chiogo. Ibala mapa dang lokti temenen ta ajar aser itemji anema raratsü arogo nem nungloktsü. Arogoi aser Laishiri iba ochimashi mapa anema tasü ita noktaktsü. Talisa, political party shirnoki tamangba anema, minority telok anema inyaker, asa-lendong yanglur iba party anema tai ta tasü ita noktaktsü. Ano government shiba nübur terenlok asoshi masü, saka pei ajungtsü asoshi ochimashi mapa inyaker iba party anema nokdaktsü. Anungji taruba ita nung Clean Election koma tajungba inyaka aotsü iba indang jembitsü ta tanabuba YSS Sensaksem osang lemsateper. Ano sensaksemba mapang, ABAM lokti teraksa yanglushiba nung tashi taitba bener aotsü asoshi tang ABAM Social Concern Committee ta aliba ya “ABAM Social & Political Concern Committee” ta amshi nunga tajungba asütsü ta lemsatep. Tsüngremi asen lima aser nüburtem ochiba asoshi moajangma kechiaser asen Kibuba Khristai ashi, “Aser nenoki ochiji metettsü aser ochi jagi nenok nüchi kümdaktsütsü.” Yohan 8:32.
(Yanglushidi Sensaksem Sabang (YSS) teloki Feb 23, 2021 nü “NBCC & ABAM Clean Election – inyaka aruba nung takok aser tamakok” onük jembidang Rev. Ayutemjen Tezülur liasü. Pai tongti o jembirtemi lemsatepba nungi tongtibang onük kar bendenba yangi adoktsür).
The Nokinketer 