Asenok state nung sen aruba main source-ji Government of India nungi state government ajanga arur. Yimden, lokti tentet balala, Naga lima nüchiso bushir telok balala aser arogotem ajak pipeline ji iba tzüpong *(reservoir tank – GoI/GoN)* nungji mesepdaker lir. Naga nationalism/ Naga nüchiso meshiba dak sentakba nung asen lima mapang talangka telemtetba tajung kati maruteti rara arur asünung, küm aika jakdang nungi “the word & concept of Government” ta süra khenyongi asen indang/pei meyong ama mebilemi tangar indang amai dang bilemba…tetezü “India” ta süra aji bendanger (others) ta asenok zü nung idakja “The Dual Concept of Citizenship (Naga Vs Indian)” nung asenok liyonga aruba agi tanü tashi asenok mulungsentsü aser tebilemba (mind-set)-ji tuning balaka nung lir aser iba jagi tebilemtsü jenti solution mungutetba timtem aika asen state nung lir.

Iyongji asenoki government scheme, property aser project ta süra India nunger indang rongsen Delhi nungi bushia bener aruba amato bilemer. Shiri bushia bener arudir par mulungba nung amshitsü, mesüra department-tem nung scheme balala indang sen arubajia shir menden nung mena achayangdir parnok mulungka asütsü. Idenji scheme/project tulu arura pei kibong, pei yimtsüng aser pei kini iba senji aittsü aser aji Tsüngremi sarasadem langzüba amato… Tatishitsü agi: item jagi pei aliba arogo aser pei yimtsüng arogotem nung tenla tululu agütsütsü, arogoi Deobar sentep nung aji sangoktsütsü aser iba jagi pa ochi mashibatem to Tsüngrem tsüngdang meshimeshia teka metsüktoker (compensate asür) amai tepela aser temulung anisüngzüker  mesüra iba jagi jangratem _(good feeling or peace of mind or complete satisfaction)_ anguba mesüka.

Shir kin, koba department nung director, secretary mesüra minister südir, aji par kin kibur amai parnok jagia bilemer aser tangar kintem jagia bilemer ta yamaji mapang talangka asenok liyonga arur. (mapang talangka state government level ajak (AHoD/HoD) nung tokolak menden 80% shi Ao kini bener aruogo). Anungji, asenok aikati Government/Government rongsenji Naga nunger indang government/Naga nunger indang rongsen amai masü, saka tangar indang amato bilemba jagi government rongsen & property-ji mashimashi (kushi-kushi) nung, Govt. scheme balala senji pei mulungka nung amshiyonga pei sasa taitsüba kecha mekai oda pei meyong maongka amai dang bilema yimyasüba-a aruba agi tanü asenok ajak kanga kangshitepba ajiteter.

Benshia aruba yimya kaji melenshitsü kanga tasak (old habits die hard) aser iba yimya nungji asen tribal hohos, student body, NGOs (Arogotem densema) kangasa arokaroka alentepba ajiteter. Tatsüba agi, tribal hohos, arogotem aser tanga NGOs-tem ya tang aliba yayim (existing system) nungji tenük sünger alir amato asadangteter.

School azüngba mapang orülem (basic grammar) shitak mangazükra, tesülen na university tulu nung degree tulu anguyonga mesüra tashi temetet tulu liaka, oda mapang shia tangari mesüra pei sasai khenkhen orülem aibelena reprangtetba amai (basic grammar problem notice asüba amai) asen nüburtem tongtibang tangazüktsü tim (basic concept) kar mashilen angateta lir. Anungji, asenok ajak lungjemer tongtibang tangazüktsü tim kar kanga junga meyipshia meyushitsüla ta ajiteter.

(Iba ya MLA & Advisor, Imnatiba-i “corruption in public life” onük nung ajemdaker tawa Yanglushidi Sensaksem Sabang (YSS) nung jembiba o kar agiteta yangi lemsateper).