~ Sashikümla Longkümer

Sorkar dak dang metaloker aliba agi mekümtettsü ta angateta lokti tilatiba nungi tenzüker tulutiba tashi pei pei yari inyaktsü arakzüba mapang. Yamaji Arogotema kangasa mazüngi pei pei sasep nung awa oa mission mapa balala mazüngi inyaktepdaki aser mangdang tasen bushiba mapang ka. Covid asenok den teti alitsü ta ashir, saka wara prokshiba ya kenübo koktettsü. Saka iba wara sülen arogotem teinyaktsüji kechisa aji aroka shisadanga inyaka aotsübaji kanga nungdak. Anungji, iba “Covid sülen arogo teinyaktsü kechi” ta asüba nung Yanglushidi Sensaksem Sabang nung shisatokden nungi tebilemba kar yamai inyak nung jungdisü ta asüba ka lemsateper.

  1. Mental health care

Joko arogotem nung counseling department trained counselors nungdaker. Tanga lima nung company, arogo, institutions ajak nung psychiatrist consultant yua lir. Tanü alima nung tashidak tulu asemji mental stress, anxiety aser loneliness ya lir. Iba atema care counseling nungdaker. – Senti Aier

Covid agi tamangertem aika tetsübo, taoksa, tasüba, tesama lendong agi menepogo. Nisung aika tsürabur, adianu, apuani, chirnur shirangdang meyaritet aser tasüba ajurudang parnok tasümang dena tenüki mongui ali nung remogo aser item purji tang tashi iba taoksa aser tesasa khangla nungi madokteti lir. Ano kibong aika nung tsürabur taküm samar tanurtem ni joko alima nung taküm alitsü menungdak, ni taküm soseta süadokner ta asübatem lir. Ano apuani tajungtiba tajungtila anojungi taküm pilar adianu aika tama taria alibatem lir. Item tamangertem asoshi mental health  care counseling agütsütsü kanga nungdaka lir, kechiaser iba timtem khangla nungi madoktetidang taküm lira parnok shi temang nung ‘taküm saka tasü’ asütsü. Akhi ama tejakleni anir arua, shilem balala agidakja, parnok den mapang indoka iba mental stress nungi nüchiba ngudaktsütsübajia asen khuret lir.

Ano iba den Covid agi kar shirangra, kinunger meshirangertema den  kiyonger aser külem tenzükeri anemponga reprangba, züngdokba, mezüngmeshi o aser mapa agi shi temang aser mental shirangdaktsüba ajurua arur. Iba ama anempong yimya yimko melenshitsü nüburtem nem angatetdaktsütsüla. Iba wara koda normal süa agizüktettsü, mental koma renema alitsüla aji sayutsüla kechiaser nisung karbo aoksar süadokba osangtema lir. Temeimtep, aria bilem aser teyaritepji mapatem ya kanga tongtipang lir.  Iba atema mobile mesüra media balala platform amshia mesüra tsüngdong oa kar denbo counseling agütsütsüla. Anungji  mental health ministry nung yariteptsü atema arogo nung pastortemi anir toklanga tenzükertem ajak training akatsü nungdaker. Covid sülen Arogoi healing aser care ministry nung kanga temulung agütsütsü nungdak ta ajiteter.

  • Medical health care nung teinyaktsü

Yisui nütsüngtem dang ashi, “Shirangertem anüpjang, tasürtem shia arudakjang, zütsüra aketertem meshitetjang, aser temenen tanelatem aridokang.” (Mt. 10:8; Mk. 6:13; Lk 9:6)

Arogo tenyaba nung temang anema aliba mapa ya tongtibang ka lir. Tanü alima ainba den külemi mozü aser hospital balala nung tanü-asüng kechi nungdaker item koltem amenoker tesem aika nung lir. Aor yimtiba Mokokchung nung itemji sendoka yuja lir. Asen nübur shirangertem tashidak tilatiba nungi tenzüker tulutiba/tesashitiba ajak  danga lima hospital balala nung rongsen jenti indoka taneptsü bushilen  senzür. Hao, jila tulu bushia aobajia junger saka ajakibo iba jenjangji malangzükteter. Takar-tulurtem kecha timtem aser tetsükdaktsü makai senzütetyong küla timtemer, makamaiter, aser sensakertemi aiben item facilities majangzükteter mesüra kari anarong tena ajangzüker saka sentsüh jenti adoker. Anungji anasatiba asen ABAM kübok aliba Impur hospital ya danga arogotem ajaki pei meyong ama shia bilema tashidak ajak anepalutettsüsa doctor area balala nung specialist peria aniokba den facilities balala ajakji reprangshima asentenshira tangar lima jila balala nung alibajia menepa tesem talangi rongsen jenti indoka moui asen nisungi asen atep tsüngdang tanebtsü angutsü. Yamaji inyakra arogoi nüburtem tanela aser taküm anaprongla kümzüktsü. 

3. Back to home mission

 Covid 19 sülenbo Aoli arogotemi pei atep nung tanela nung takar saka shi nung sensakertem nem khen temulung agütsü nung koda! Asen lima nung tanüa-tanü aser asünga-asüng (hand to mouth) ta timtema aliba pur aika lir. Item nüburtemji asen atep nung aliba ‘harijans’ teküpoktiba (have not) tem den jenjang kasa masü na! Sama aliba aser makamait lima asoshi asenoki süoshi nungi tenzüker chiyungtsü aser sen-o-tsü bendena merangtepba tenlar saka asen atep nunga tanü poksüng mangurtema aika dang lir. – Zülu Jamir

Yimtak yimtsüng nung tantsür tamburtem chirnur semchisemnur ajak jila balalai prokshia oadoker  teyari makartem anarong dena alibapurtem jenti lir anungji itemji reprangteta pei atep nung tzüraseta, yaseta, asükseta aliba santem dangi khen meyiptsüla. Kibongtem atep tonga oa arogoi temulung agütsütsü mapang ka. Pastor Tiatoshi Longkumer-i ashiba ya aroka shisadangtsüla. Pai yamai zülu, “Tang tashi nung arogoi aser local societies temi kibong mapang ajak amshiadoker kidang alitsü mapang magütsür. Ni bilemer arogo sentongi kija mapang onsara chitsüba ya ajemtsüla aser arogo ministry ya kipoki aitsüla, tat. agi, kibok kisem aoba yimya ya joko lokti nongzüba anentsüla aser nisung ka ana mesüra nisung kati ka den sarasadem aser counseling agitsüla ta bilemer.” Iba den külemi küm shia iba ama timtem aser wara mapang amshitsü atema arogotem annual budget nung inoka ayutsübaji kanga tongtipang lir.

4. Media ministry/evangelism

Tanübo computerized world ta dang masü, robotic age ka nung lir. Alima memejangi koma ainer, chirnurtem aser lanurtem koma tejakleni aor ibaji asen tenüki asangsang nung angur. Lanurtem atema social media influence kanga ulura aser iba media  timi  amshitsü nungdak ta Covid mapang tali jungkai adokogo. Junga amshira arogo aser mungdangi pei talidak nungi home aser foreign tashi oa Osangtajung kulisüba inyaktettsüsa putu kati arutsüogo. Tekülemi marurtem, maruteter, shilu manemertemia YouTube, Facebook, Instagram aser ano yamala mesükba media balala ajanga tongteter. Bendang lima nung oa alir chirnurtem, arogopurtem, sensopurtem den Tsüngrem O sayutsü akoker. Tanurtem lockdown mapang Sunday school aser child sentep melitetba ya kanga takoksa, saka online class tenzüktsüsa putu kati bener arutsüogo. Lenirtem aser tenzükertemi  tsüngdong moutetaka sentongtem aika nung Covid yagi virtual meet maongka agütsüogo anungji ibai maneni akatsüla aser kati ka nungi angazüktepa ajungshitepa aotsüla.

5. Lanurtem taküm jenjang amentetba nung arogo teinyaktsü

2019 küm tatemlen nungi tenzüka iba wara prokshia aoba sülen India lima cities balala aser foreign lima nungi lanurtem pei mapa doktsür meyirijangsa meyirijang pei limai meyipa aruogo. Anungji item lanurtem asoshi arogoi asalendong kar achaayanga parnok pei sasa noktaktetba lemang bushiba nung yaritsü kangasa tongtipang kümogo. Sempet tajung aketba lanurtem, tazünger, tashirtem aika arogo, lokti balala aser sorkari nungitetra takok ngua inyaktettsüba purtem aika dang lir, saka itemji teimba ka sen tashi makartem lir. Anungji arogoi küm ana mesüra asem atema tetemlok meketi loan agüja parnok farming, business mesüra mapa balala tenzükdaktsü nung küm ishika tsüngda nung parnoki pei sasa pei teka agi inyakteta, züsenteta tepok sünga alitsü aser nokdaktettsü. Ibai ajanga arogo rongsen ketsüng nunga tashi ita akümtsü. Tang arogo kari inyakdagi ano maneni tanungba arogotemia item mapa tajung ajizüktepa aotsüla. Ano school drop outs-tem atema arogoi achaayanga vocational training balalai yoka parnok taküm jenjang yangluba nung shilem maneni agitsüji kanga tongtipang. Tanela nung taneptsü/tekümtet kisüng masü saka rongsen ketsüng, shisatsü, taküm jenjang ajak nung tanebtsü nungdaka lir. Iba dak sentakba nung Changtongya Town arogoi inyakba Pastor Temshi-i yamai lemsatep:

Yimti temeküt aser telongzük nung  rongsen ketsüng amshiyim aser achaayangba nung Arogo teinyaktsü (Economy Ministry) wadang lir ta shisadangtetta, 2020 küm Arogo yinti Mungdang nung iba Ministry ya tongtipang ta ajaki mulungtepa lemteter  iba wadang atema  Arogo budget nung Sen 1 lac ( Rupees one lac) inok. Arogoi Economy Ministry Committee ka shimtsü aser Committeei meeting mena iba wadang ya koda inyaktsü jembitep. Meeting anaben mena Changtongya Town nung ku (hair) mejeptsü nübu ka kanga nüngdaka aliba mapang ka nung, iba sempet aketter  lanur tajung ka, sempetbo lir saka iba sempetji amshia rongsen bushitsü  rongsen tsütsü tebilemtsü aliba ajanga pei sasa menokdakteti aliba Arogoi reprangteta tsürabur aser tanur jaoka iba mapa inyaktsü mulungtepa jembitep. Anungji Arogoi ku mejepdang amshitsü atema  nungdakba osettem ajak alitsü. Ku mejepdang amshitsü aliba osettem  ajak Arogo property asütsü aser lanur shibai ku mejeptsü mulunga agizükogo ku mejepba nungi ahzükba tajangzük ajakji pa meyong asütsü. Yamaji lokti tajangzük dang masü, pa rongsen lemang nung kanga junga amentetogo. Tanü asen lima lanurtem sempet balala aketer aika lir anungji pei sempet amshia mapa inyaktsü Arogoi ajungshir, aser maneni  Economy Ministry Committee ajanga ibala mesükba mapa  tarutsü nung  inyaktsü tebilemba lir.

Iba Covid yagi rongsen ketsüng  nung tangar dak dang metaloker alibaji kanga lendong aser teimla maka ta angazükogo. Anungji arogotemi entrepreneurship, holistic mission nung temulung kangasa agütsütsüla. Arogotemi training aser placement nung yaritsüji kanga nungdaka lir.

Covid-19 sülen teinyaktsü kar

  1. Covid wara ajanga health care kanga majung ta jungkai adokogo. Mokokchung Town/district nung hospital ka Kohima, Dimapur nung aliba ama alitsüla. Iba atema ABAM aser arogotemi, government teyarisa mebushiaka aseni inyaktettsü lemang aika lir. Ano Impur hospital ya Aoli Arogotem ajak senteper tanü tensa den apet facilities upgrade süa yanglutsüla.  Anungji arogotem aser Mungdang budget nung health care atema priority süa inoktsüla.
  • Covid-19 sülenbo Aoli Arogotemi pei atep nung sensakertem ajungkettsütsü khen temulung agütsütsü nungdak. Asen lima nüburtem tanüa-tanü aser asünga-asüng (hand to mouth) ta timtema aliba pur aika lir. Item nüburtem terenlok asoshi arogoi inyaktsüla. Arogo aser Mungdangi budget nung küm shia item makamaiter ajungkettsü nükjidong nung sen peria endoktsüla. 
  • Covid wara ajanga asen arogotem mental health mapa nung anunga lir ta metetogo. Joko arogotem nung counselling dept. trained councellors nungdaker. Tangalenbo company, arogo, institution ajak nung psychiatrist consultant yua lir. Tanü alima nung tashidak tulu asemji mental stress, anxiety, aser loneliness ya lir. Iba ya counselling aser humane touch and care nungdaker.
  • Assam nung asenok aosu mekümdaka lir ta jangjaogo. Local farming nung temulung agütsütsü asoshi Arogo sabang balala amshia ajungshitsüla. Tangar dak  metaloki pei sasa züsentetba ajanga dang kin ka tejakleni otet ta Covid ajanga agütsür. Smart farming nung asentenshitsü nungdak. Iba den food preservation, marketing balala nung yaritepba nung Arogoi shilem agitsüla. 
  • Social media koda tongtipang aji Covid ajanga tali jangjashiogo.  Member care mapa ibai ajanga tashi taitba akümtsü. Anungji Arogo aser Mungdangi social media tajungtiba nung amshia tenyaba mapa, atepdang aser arrtsü atena oa, inyaktsü asameyang tajung akatsü nungdaker.
  • Akok tashi Arogo program ajemtsüla aser ministry teimba inyaktsüla. Tenla kidang dang arogopur ajak sentepba yimya ya ajemtsüla (less mass gathering) saka nisung alidaki arogo aotsüla aser ministry inyaktsüla. 
  • Kibong nung arogoi temulung kanga agütsütsüla. Tang tashi nung arogoi aser local society-temi kibong mapang ajak amshiadoker aser kidang nem mapang peria magütsür. Arogo programi kija mapang onsara chitsüba ya ajemtsüla aser arogo ministry ya kiboki aitsüla.  Yangji mapang indoktsüla.
  • Covid mapang rongsen ketsüng maparen nung tangar dak dang metaloker aliba ya kanga lendong ta angazükogo, anungji arogotemi entrepreneurship ya mission ka amai temulung kangasa agütsütsüla. Iba atema pei arogoi akokba tashi item maparen asoshi software & hardware, placement  nung yaritsüla.  DABA, KABA, MTABA aser CTBAi inyakba ama, arogotemi pei akokba inyak nung ajungtsü. Arogoi kodang iba ama mapa takok ngua promote südir, arogo rongsen ketsüng nung anünga malitsü.
  • Covid mapang senior citizentem kanga azüngmeyaka okrongba nguogo. Tang Covid tensa nung ya social media ajanga ministry nung kanga yaria arudar, yamaji süaka tsüraburtem aikati YouTube lapoktsübo doktsür call ang sünga magizüktetba purtem rongjenseta timtemba nguogo. Anungji item tsüraburtema tanela nung mesüa taküm tempangdaktsütsü kanga nungdaker. Joko parnok atema separate ministry ka kübok mejeta parnok atema ministry tenzük junger ta bilemer, kechiaser arogo sannükeri anir tang aliba full time stafftemi dang ajak anepalutsüji mayimjemteter aser mekokminer tsürabur atemaji extra care nungdaker.
  1. Ochimashi, süpokrem, mimchia inyakba mapatem atema kari RTI apply süa inyakba ya kangasa tepelatsü tulu lir. Mungdang aser Arogotemi nungitettsüla aser item anema people’s movement tenzüktsüla. Kodang asen Ao lima nung tenzükdir, Naga nungeria asen tsüngsü nung anidaktsü ta amanger.  Covid-19 sülen Mungdang lenisüba nung Arogotem ajak lungjemer People’s movement against political corruption, social injustice (gender issues), economic deprivation, back door appointment, poor medical health care, festival mindedness, substance abuse, etc nung lungjemer nokdaktsüla.

Otem

Temalen shisembatemji karbo tang teinyakdak lir, aser ano maneni tajungtiba nung tarutsü nunga inyaktsüla. Tanela aser shi taküm sentaktepa lir aser lirumedema arogoi inyaktsüla. Mapa tasen inyaktsü jangratsüla.  Tulutiba nungi tenzüker tilatiba tashi agi “arogo” ta asüdangji Tsüngremi jatetba tamanger teloki akümba angateter aser idakji ajak dena lir ta angatettsüla. Arogoji arok meyong aser arok ajungtsü asoshi inyaker. Shisatsü, rongsen, nübu, sarasadem nung ajaki mulungsoa aser bendanga agüja ibai arok tebilemtsü aser teinyaktsü khuret ta angatetra, iba jagi ajak takok ngua inyaktettsü aser Tsüngremer nükjidong atalokdaktsütsü. 

*****