Chuchuyimlang Kaketshir Telongjem Educational Trust-i lanur zünger mapa mungui alirtem asoshi “owning our future” omen dak rangloker Dec 9, 2021 nü Chuchuyimlang yimdak Imlang Salang nung shisatokden sentong tajung ka katsüogo.
Iba sentong nung MARCOFED Ltd. Chairman, Dr. M Chuba Ao aser MARCOFED Ltd. Vice Chairman & Nagaland Gandhi Ashram Chuchuyimlang, Managing Trustee, Dr. Aotoshi na shisalen sayur liasü. Tena kadi “entrepreneurship: Origin, Meaning, Morality and Destiny” aser kadi “entrepreneurship: government/Institution Schemes and Support” onük nung amendaker tensa den apet shisa rajem aika bener arua anganüa agütsü.
Iba sentong nung Chuchuyimlang Village Council Chairman, Wb. Aosanen Pongen-i jembidang, tanü state nung sorkar mapa nung nisung onsara idaktsür sorkar koda masü tensa ka nung aser kümshi lanur tazünger teimba-teimba züina akümer, iba ama tebilemtsü ka nung, lanurtemji tepok sünga alitsü asoshi lenmang karbo bushitsü nung dang ajungtsü ta tangatetba yur iba shisatokden sentong ya ayongogo, ta metetdaktsü.
Nagaland nung industry mali aser sorkar tsütsü lenmang kanga temesü, anungji, shinga dak nentaka melii pei sasa mapa apiteta taküm lia aotsü nükla tulu yur iba sentong ya akar, anungji, taoba mapang shisatokden akaba amato mesüi temulung ajak agi angazüker mapa küma taküm lenmang karbo lapoka otettsü asoshi paisa tadenertem ayongzük.
Yimden/Arogo lungjemer aser yimer bendanglen alirtem teyaritep nung rongsenketzüng tsütsü jenjang ajungkettsü asoshi mapatong kar inyaktsü tebilemba lir, item mapatong ajanga lanurtem nem mapa inyaktsü maongka lapoktsü aser ibaji ajanga lenmang aisü nung tajangzük angutsü imlar, ta Council Chairman Wb. Aosanen aser Chuchuyimlang Baptist Arogo Pastor Rev. T. Lima nati osangbenertem den jembidang lemsatep.
Shisalen sayur Dr. Aotoshi-i jembidang, business/entrepreneur ka akümtsü asoshi temulung tulu asüba den pa/la dakji – bendanga agütsüba, meranga inyakba, ochishiba, tazüokba, taremzük, tamang katetba, tasen yangerteta otetba, tejangraba aser nükjidong tejangja yur inyakba nübu asütsü nungdaker, ta ashi. Pungmang kisüng pungmanga kazüba jagi business nung takok mangutsü, ta paisa shisem.
“Ni meinyaktettsü ta masü ni inyaktettsü aser merangtsü” ta asüba mulungsentsü nungdaker, ta paisa ashi. Business mapa nung temenen mapa inyakra kodanga takok mangutsü, ta paisa tekümdangtsü ka ashi. Paisa Arogo-ia entrepreneur tsütsü temulung agütsütsü asoshi ajungshia liasü.
Bank loan ya kanga kümdanga agitsüla, kechiyong bank nungi kodang senji apudir ‘asen taginüba ajak to nüngdakba kümdaktsür, anungji, kechi nükjidong atema senji apur, ibaji mamatoktsüla’, ta pai ashi. Business ji teti kasa dangbo malir, khenkhenbo takoksa ajurutsüa akok, anungji, koda masüba mapang amshitsü atema sen rizünga ayutsüla aser rongsenketzüng shisatsü dener mapa inyaktsü asoshi paisa ajungshia liasü.
Iba sentong nung yimdak zünger mapa mungui alir lanurtem den arogo tenzükertem, putu yimsüsürtem, VDB züngsem aser Chuchuyimlang VDVK nungi züngsemtem shilem agia aden. Shisalemsatepba sentong balaka agia liasü.
(Source: Tir Yimyim)
The Nokinketer 