~ Imli P Lemtur

Nisungji sobaliba asoshi yanglu masü saka sobalibaji nisung asoshi yanglu. Sobaliba tajung aika lir aser asenoki itemji kar maneni benshitsüla aser karbo wazüka ayutsüla. Alima nung sobaliba aika liasü saka sobaliba koba nisung meimchir asoshi mapet liasü, itemji agienba/anendaktsüba (abolished) asenoki alima otsü nung angutsü. Yangi kar lemsateper.

Sati: Hindu Nunger Sobaliba

Sati tetezü kinungbo tasümang den külemi kinungtsü arongba/aremba dang ajar. Ibai Hindu nunger sobaliba ka liasü. Hindu nunger sobaliba nung amtsürji kecha jenjang mali liasü. Kodang kinungbo südir, kinungtsüjia kinungbo den külemi taküm arong/arem. Iba dangji Sati ta ajar. Aji Hindu nunger sobaliba liasü. Saka nisungji sobaliba asoshi yanglu masü saka sobalibaji nisung asoshi yanglu ta angatetta, William Carey, Ram Mohan Roy nungeri anir, iba sobaliba anema apuso aser Governor-General of India Lord William Bentinck ajanga 1829 küm Sati ya agien/anendaktsü (abolished). Osang tajung.

Amitsür Kibalembo: Hindu Nunger Sobaliba

Hindu nunger sobaliba nung, amitsürji tanaben kibong akümtsü memela liasü, saka teburbo kwiben kümnüdir aküm. Anungji, nisungji sobaliba asoshi yanglu masü saka sobalibaji nisung asoshi yanglu ta angatetta, 26th July 1856 nung Lord William Bentinck ajanga amitsüra tanaben kibong akümtsü asoshi ozüng ka yanglu, koba dang Hindu Widow’s Remarriage Act 1956 ta ajar. Joko tanübo Hindu nunger sobaliba nung tetsüra, tanaben kibong akümtetter. Koda jangratemsü.

Alar (Slavery) Ayuba Sobaliba

Linük teimba ka nung alar ayubaji sobaliba ka ama benshia aru. Saka alima tanagateba leni aoba ajanga, nisungji sobaliba asoshi yanglu masü saka sobalibaji nisung asoshi yanglu ta angatetta, America nung Tir Abraham Lincoln mapang 1865 küm alar ayubaji agien/anendaktsü (abolished). Ao lima nunga alar ayuba yimya missionarytemi anir anendaktsü. Angatetra, takoktsü lenmang lir.

Islam Sobaliba nung Balaba Ozüng: Triple Talag

Talag tetezü balaba. Triple Talag tetezü, Islam nunger sobaliba nung kinungboi kodang pa pang nungi talag ta asem atonga shidir (Talag Talag Talag), joko ibaji balarba lir. Idangyongjisa balatsü (instant divorce). Shingaia ibaji meyipa agitsü makok. Kinungtsüji joko ki doktsür aotsüba dang. Muslim nunger tebur dak iba sobaliba tashi aliba ajanga Muslimtsür aika tekübok jenjangi ai. 2016 küm Muslim tsür ka Shayara Bano, lai iba ozüng anema court nung case agütsü aser nüburtemi, nisungji sobaliba asoshi yanglu masü saka sobalibaji nisung asoshi yanglu ta angatetta, 2019 küm, The Muslim Women (Protection of Rights on marriage) Act 2019, ajanga iba Islam nunger sobalibaji India nung agien/anendaktsü (abolished). Yabo tawa atalokba lir.  

Kinungtsü ka dak Tali Yutetba Sobaliba (Polygamy)

Sobalibaji aser yimden yimsüsübaji tebur meyong ta mapang talangka angatetta aruba yong, teburi kinungtsü asütsü asoshi tetsür ka dak tali yutetbajia kin aika nung sobaliba tajung ama aru. Saka, nisungji sobaliba asoshi yanglu masü saka sobalibaji nisung asoshi yanglu ta angatetta, 1956 küm India lima (Muslim nunger maden, saka tetsür pezü dak tali magitettsü) nung polygamyji agien/anendaktsü (abolished). India  nung teburtem kanga jashiteper alitsü südi.

Yihuda Nunger Sobaliba Nung Sabbath Ozüng

Yihuda nunger sobaliba ozüng nung, anogo trok nü tashi mapa inyaktsü aser tenetji Sabbath anogo, temeshi anogo, Amungnü, Kibuba-a anisüngzükba anogo, anungji Yihuda nunger ajak mapa meinyaktsüla ta kanga sashia benshia aru. Shibai Sabbath raksadir tepsettsüla ta sobaliba aru. Yisui Amungnü shirangertem anebtsüba ajanga Farisitemi Pa dak tai apotsü merang. Saka Yisui yamai langzü, “Amungnüji nisung asoshi yanglu masü saka nisung asoshi Amungnüji yanglu” Mark 2:27. Tetezü, Amungnüji nisung meimchir dang nungi tuluba/tongtibangba masü ta ashirba.

Alima otsütemji reprangdangra, kin balalai, par tendak aser pei tendak apet sobaliba balala kanga metsünga reta benshia aruya liasü. Saka sobaliba koba ajanga nisung ka taküm raksatsür aser kin ka teküpok tiai anir alur, item sobalibatemji agienba/anendaktsüba mesüra melenshidaktsüba asenoki angur.

Sobaliba ya Kechi?

Asenok Aor sobalibaji taküm (life). Sobalibaji, tetsü-tebou ken atenba ya dang masü. Sobalibaji, asenok sübosolemba ya dang masü. Sobalibaji, oshi ya dang masü. Sobalibaji, among tsümong mapang yi jemtepba ya dang masü.  Sobalibaji tzüzüng ozüng ya dang masü. Sobalibaji asenok libaliru ajak ya lir. Anungji, sobaliba koba ajanga nisung ka jenjang ajungketter aser kin ka ajungketer item sobalibatemji akangshia amshitsüla aser koba sobaliba ajanga nisung jenjang raksatsür aser kin ka teküpok tiai anir alur, item sobalibatemji agien/anen/melenshi tajungba, kechiaser, nisungji sobaliba asoshi yanglu masü saka sobalibaji nisung asoshi yanglu. Anungji, kechi sobaliba südir süaka, sobalibaji nisungi yanglushitsü koka lir. 

Aor Sobaliba nung Aenkishiba  

Aenkishiba ya Aor Sobaliba Ozüng rongnung tenük telen ka lir. Kodang yim kati yim ka anema aenki shidir, iba yim ana tsüngdaji kecha tsüngdaktep mali akümer. Temesüng oshi nung aenki sshiba dang banned, total cut off mesüra forbidden ta anagtettsü akok. Ano iba dang ya tarokba olong alitsü südi. Temetetteri zülusemtsü akok.

Asenok limapur süa aliba mapang nung, otsüla obula nunger mapang nung, yim ajak den arr yimer aliba mapang nung, tekolak bushitepba mapang nung, yim o yim na tsüngda tashi toktepba mapang nung, aenki shidirji kanga tapet liasü, kechiaser par mapang nung kijaliba lokti (individualist society) tensa nung liasü. Asenoki manganüaka, akhi asen Aor putu mapang, Osangtajung marudang, yim kati yim ka dak aleptsüba dak alaka, tajung yimlatsü kecha mali liasü. Aji asünung, kijaliba loktiji kanga tapet liasü.

Saka Tsüngremer taochi nung, 1872 küm, asenok dak malangaka, Aor dangi Osangtajung arua, leptep tsüngtepba anenadok. Tanübo, yim kati yim ka den kiba lempoa, akangjungshitepa sobaliba arutetba putu ka nung alir. Asenok kijaliba lokti ka masü ta asenoki metet. Yimti ka aintsü asoshi yim ka teyrai nüngdaka aliba putu ka lir. Yim ana tsüngda kodang mangatettep adokdir, Ozünglaba sapang balala nung, shisa dokdena, o lemtettsü, oshidangtsü koka aliba putu ka nung asenok alir.

Anungji, tanü putu nung, Aenki Ashiba Sobaliba nung shir yimi ashir aser koba yim asoshi ashir, iba yim ana prongla asoshi Aenki Anshibaji kecha tajangzük mali. Aortem aenkishiba sobaliba ya meyipa bilemdangdi. Tanü putu nung mapet.

Otembang

Akhi otsüla-obula nunger mapang, asenok yimtsüng ka nung, arr nokdangtsü asoshi atsü atsür, pei litep litepa, pei dak apet sobaliba tzüzüng ozüng balala benshia aru. Aji par mapang asoshi kanga tapet aser tajung liasü. Asen yim wazüka yutetba asoshi asenoki parnok nem akümtsübu agütsür.

Saka tanü, asen chirnur yimdak yimtsüng adena or, bendang lima nung, pur bendanger den kiba lempoa aliba putu ka lir. Anungji, aenki ashiba ajanga Yimtsüng nung alirtem dang masü saka Bendangali Senso ajak dak kongshir. Akhi mapang yimtsüng telongtet nung dang litepba mapangbo, Aenki Ashibaji tapet liasü, saka tanü, asen chirnur pur bendanger den sobaliba aoba mapang ka nung Aenki Ashibaji ajak asoshi tebilemtsü khuret tulu lir.

Anungji, sobaliba koba ajanga tajung adoker, nisung nüchi kümdaktsür aser kin ka ajungketer, item sobalibatemji maneni benshitsüla aser sobaliba koba ajanga tajung madokdatsür, tsükchitep bener arur, nisung jenjang ludaktsür aser kin ka telung leni ludaktsür, item sobalibatemji agien/anen mesüra melenshi tajungba ta angateter, aser agientsü/anendaktsütsü/melenshitsü sobaliba rongnung aenki ashiba ya ka lir ta tanü lanu putui ajitetter.    

*****