~ Maong Jamir

Küm shia June 26  anogo alima ajunga nung  drugs achiba aser drugs shishilembaba anema noktakba (International Day Against Drug Abuse and Illicit Trafficking) anogo amunger. Iba anogo amungba nükjidongji alima ajunga lungjemer drugs achiba aser drugs shishilembaba ajanga alima koma raksar iba indang nüburtem nem tangatetba agütsütsü asoshi lir.

Mozü achiba yimya ya 1980s nungi tanem-tanemi asen lima nung pulua achitsü tenzük. Oda 1960 küm asor nungi shir aika drugs agi taküm agiogo, aser tanüa aika drugs lar lir. Mezüng drugs achir adokdang asenoki parnok koma anepalutsü mesüra kechi treatment agütsütsü memeteti aru. Tanü putu drugs aser yi tebilemtsü ya Government mesüra NGO khuret dang masü ta angateta asen Ao Arogotem aika nung Detox Camp agia arudagi. Iba asoshi Arogotem dang pelar, aser Tsüngrem tenüng asanger. Iba detox sentong dak alaka ano arogotemi angateta alitsü asoshi tebilemba kar lemsateper.  

Mezüng drugs achitsü tenzükertemji drugs achiba ajanga kechi teimtem lir ibaji memeteti tenzük. Tanü parnok melenshinüaka mokokteter, kechiba süra iba ya parnok  temang asoshi tashidak ka kümadok. Kodang parnoki amshiba drugsji mechilir parnok temang nung meshitetba teimtim angur, oda teret telong tashi mesaka ayanger. Anungji melenshinüsaka iba teimtim aikati mokokteter aser maneni achir. Anungji drugs achir temji shiranger nisung ka aser tapet treatment agi dang koktettsü.

Kodang nisung ka drugs aser yi lar akümer, parnok temang raksabaji dang masü saka taküm rangpen ajunga tekepokba jenjangi atsür alur. Detox camp yabo parnok drugs machitsü merangdang temang nung teimtim tekangshi jenti angur anungji iba mapang tapet mozü aguja anepaluba mapang ka dang lir. Parnok küm ka, küm pungu, mesüra küm ter tema chia arudang ‘taküm rangpen’ tekepokba jenjangi aluba nungi atsütettsü asoshi anogo 10-15 Detox camp agiba ajanga sayatenya ka agi mesüra kodanga mokoktettsü.  Anungji ‘taküm rangpen’ anepaluba mapang aser tesemji ‘Rehabilitation Centre’ ya lir. Iba Rehabilitation agütsütsü asoshi asa lendong junga meyanglura ano tejenba lenmangi meyipba shilangtsü ana nung lir.

Asen Arogotem nung detox sentong akaba dak alaka tongtipangba sentong ka nüngdaka lir aser ibaji ‘primary prevention’ lir. Primary Prevention ta süra, ano drugs aser yi mamshidang tila tanur aser lanurtem nem drugs aser yi nung kechi lendong aser teimtim lir iba indang tabensa shisatsü lemsaba indang lir. Nübortem lendong balalai aiba tera tulutibaji memetetba mesüra shisatsü maliba ajanga lir, yamaji drugs aser yi lendong indang shisatsü maliba/ memetetba ajanga aika lendongi iogo ano tanüa memeteti tanurtem aika iba lendongi ajemoka aitsü ana nung lir. Tanü alima ajunga nung Primary Prevention ya sa tongtipangba ta angateta iba sentong dak rangloker inyaker.

Küm ishika drugs amshiba ajema küma oa liasü, saka tanü asen tendak ano drugs tasen aika adoka lanurtem aika iba lar küma odar. Tanü tali bulua amshiba drugsji ‘Sunflower’ Heroin lir (iba ya sunflower tejang sateta achiba to masü). Iba drugs ajanga addict akümtsü mela melar. Ano asenok anasa election arudarji, kanga atenseta tsübuseta bilemtsür. Shir kibong, shir kiyong, shir yimtsüng, shir lokti nung drugs amshir tali adokdir iba tesem/lokti  nungji ashikelaker, aoer, rakzükraktemer, nisung tepseter, ozüng raksar jenti adoktsü. Süra drugs achir madokdaktsütsü merangba tajungba asü repranga atar detox camp ka akatsü mesüra repranga atar lokti-i merenshitsü, mesüra lokti nungi aridoktsü?. Shiranger anepaluba dang nungi meshirangdaktsütsü merangba tajungba masü na? Shiranger anepaluba nung rongsen, nebu aser anibelem jenti lir ta angatetdi.

Arogotemi drugs aser yi tamshidakpurtem yariba den külemi primary prevention nung ya temulung agütsüra tarutsü lanur putu tajungba nung odisü ta tebilemba lemsateper.

*****