By Wati Longchar, Serampore

Tejen Lai Chubatem kaket nung tetsü anati jabaso ka tepseter soa achiba, aser ano ka achitsü asoshi miimatoker raratepba tesüngmangtsü otsü ka zülua angur. Solomon chubai rongsen onsara merumerua bendenba ajanga nübur sensak tiai yokba ajanga pa sür külen  (930 BCE meta), Israel yimli ana küma sadang – Anüdoklentip (Northern) aser Anüolentip (Southern) ta lemdangba angur. Anüdoklentip yimli nung Jeroboam  Samaria yimli nung chuba mapang, Siria nunger den tsükchi adok. Anungji, Siria chuba Ben-hadadi sepai anitener oa Samaria küm asem tashi longbang. Covid-19 lockdown mapang ama, tashi tait sepai jentii Samaria yimtiji longpang; shinga  aittsü aser adoktsü memela aser shirnok adokdir tepsetsü meita ataa liasü. Anungji chiyungtsü tanga lima nungi bener marutet, shishilembatsü aser mapa inyaktsü mokoki aküm. Samaria nungeria yimti telungi tsükchir shiba aitdir tepsetsü renema liasü. Siria lockdown mapang nüburtem tebangi rasa meshitetba ayawara taku liasü, pei chir tashi tepseta achitsüsa akümba wara agi atong.  Covid-19 chiyungtsü wara dang nungi tesashiba nüburtemi Tejen Lai mapang ajuru.

Sen lira mapang mashika ka nung chiyungtsü alitsü akok, saka sen anpo nung inoker soroa achitsü makok. Chuba aser Samaria nunger ket nung taribi sen liasü, saka alitsü asoshi chiyungtsü makai aküm. Taya agi tanguba ajak achitsüsa aküm, tat. agi., Israel nungeri gado shi machir; mapa inyakdaktsüba shiruru, khu bener aser nisung sanger/mener senzüba shiruru lir. Meimchir nem lenmang aisü nung tajangzük aser teyari agütsür. Tashi angaba shiruru asüba agi machi aser Laishiba nunga ajemalu shiruru ta shia angur.  Saka iba Siria lockdown mapang gado kolak ka nung taribi sen shekel tir yong ayok. Akhidang anogo ka hachira taribi sen shekel ka liasü; akhi mapang amshiba shekel 80-ji tanü India nunger sen Rs. 65,000 shi asütsü südi (tetezü tanü nashi kolak ka Rs. 65,000 agi aliba amai asütsü), aser ibaji sotzü muluzüka ajem südi ta Tejen Lai putishir karibo ashir. Ano guduru scü marok touzük shilem pezüsü kümer ka nung taribi sen shekel pungu yong ayok. Taya agi guduru scüji tzü nung jung junga aishir (rüshir – mongsen nung) ajem kechiba süra Samaria nung ayawara tulu liasü. Nisung jenti, talisa sensaker, aika küm asem Siria nungeri lockdown asüba mapang nungji taya agi sür alitsü.

Ayawara onsara kukua aküm nungji meimchir taküm alitsü mokoki aküm, yongji tetsü anati pei jabaso ka khen ka khen ta soa achitsü lemtet. Jembiba ama ka soa achi,  aser kodang ka soa achitsü mapang aru, tetsü  kati miimatok. Jembiba ama tepseta mechitet raratepa alidang, tia kaa Chubaji jara anasa süia ao, idangji tetsü kati teyari asüngdang. Idangji Chubai ashi, “Kibubai na meyarira kong nungi ni na yaritsü? Motsüngnem nungi mesüra tsükmenatzü menüngdak nungi ni yaritettsü asü?” Tetezü tanga lima nungi chiyungtsü bener marura, mesüra ali nungi chiyungtsü peria madoktetra sen kisüng nüngdak mali aser oset-tsüset yangludak machine aika liaka koda sür chiyungtsü ngutettsü ta ashir. Kodang chubai ojala ana otemji angashi, pai pa süoshi shisa aser anem sü abener Elisha tenüng tetshia jepa sarasadem aser temulung meyip (2 Chubatem 6:24-30).

Samaria nunger ojala anati pei jabaso tepseta soa achiba, gado kolak aser ozü scü sen aikati aliba otsütemji purapuji mesüra sangrasangjia yangluba otsü ka masü, saka shitakba nüburtemi ajangshiba otsü ka. Chubai tangar kin den yimjung nung melitetba, pei ajung dang bilemba; nübur jenjang aser nüngdak memetetba; aser ni yamai inyak nung nübur timtem ajurutsü ta masadangtetba chuba. Chubai tamachi mapa inyakba ajanga nübur ayawara tiai yok. Tanü asen yimsüsürtema security teperi yur, sen aika rizünga yur, aser chiyungtsü talubu den AC room nung mener alirtemi nübur koda timatemer metettsü makok. Covid-19 mapang yimsüsüri mebilemdangi telemtetba agiba, temulung aria mebilemi health system senzüka yutsüba ajanga nübur aika shisabulu aser timtem nung lir. Migrant workers aika lockdown agi hajira moteter anungji taya agi kangshiba angur. Küm ter ana tetsür chanu ka Andhra nungi par limai anogo asemnü  tetsüng agi 150 km jajadang len tom nung taya aser tsüraseta asüba osang züngogo.

Siria chuba Ben-hadadi anir sepaitemi Samaria longbanger külen nüburtem taya agi südaktsüba ama Naga nunger taya agi asütsüsa kechi agi longbanga lir? Naga nunger shirnoki lockdown süja lir. State ngur küm 60 ajunger, saka  terenlok mapa nung tangar state memeneptsüsa akümba ya shiba aser shir telok tai ajanga? Yim kar nungbo lenmanga mali, light, tzü mali – shiba tai? Tanü tashi Nagaland nung medical college, engineering college kata mali – shiba tai?  Tanü Nagaland nung lanurtem degree tajung ngua zünger mapa mangurtem joko noklang nung 35 shi ta ashir – ya kechi tai ajanga? Kechi agisa Naga nunger tejakleni moutettsüsa longpanga lir aroka bushitsüla aser yanglushitsüla.

Alima ajunga nung rongsen takar lima kari dang bendenatoktsüsa capitalist system aliba ajanga alima aika sensaka kümdaktsür; ano kija takar ishikati dang bangdak yimsüsür den teka amteper rongsen bendenatoktsüba yayim; ochimashi mapa, yimsüsür merumeru, election nung sen agi meyongnem alitepba; alar kümdaktsüba shisaliok (colonial education system); arogoi nübur nüngdakba tenyaba mapa meinyakba aser yamala mesükba aika agi Naga nunger longpanger nüburtem kangshir. External aser internal yayim tamajung aika agi alenpanga lir. Asen sasa yangluba aser bener aruba (internal) ka kobai Naga nunger putu aika telungi yokbaji gun culture nüchiso tenüng nung inyakba yaa ka lir. Ashiko nisung aikati manganütsü akok, saka Naga national movement ya mesen tamajung (parasite) ka ta ajaki shitettsü (original Naga Independent nükjidong nungi melenshiatok nung); ibai ajanga Naga nunger tejekleni mouteter. Telok balala lemsar sen sen dang bushiba telok; tanir tanir dang, ajia minister level nung dang, aser sepaia captain tekümbo aika mali, aser sen  sen dang meimba agi telungjem maginür. Nation worker, Naga nunger asoshi taküm tenlartem ta, saka parnok o parnok na katepdang Naga nunger lanur tajung aika süogo ni! Auyaba aser rakzükraktemba agi parnok aika takar kümogo, kia tajungba aser tuluba, aser karbo ana-asem tashi süteta lir, karbo ali tululu alia lir. Pei adianu, kinungtsü mapai jurpojosti agi govt. mapai anioka yur, mapaibo maor saka ita sen dang agizüka agir ta aika lir. Lanur kari pei sasa inyaktetba mapa tasen kar tenzük nunga tax, süngdong ka pei alu nung tsüngok nunga tax, au (bamboo) alep nung tax, ak ka metsütet nunga tax, Govt. servant danga tax, Govt-i terenlok mapa tila ka inyak nunga tax aser iba den fake nation worker, Bangladeshi dena anioker tax sarua senzüdaktsüba osang kaket nung züngogo. Taoba mapang ka nungbo arogo danga tax meshia aru. Nagaland nung income tax govt. nem magütsür saka Naga limaji tax teimtiba agütsuba State asütsü südi. Item amala taxation mapa dang pei sasa akang akanga longbangba  mesüra lockdown asüba ta ajar. ACCUT aser lanur telok balalai multiple tax agi Naga nunger kangshir, pei lima nung tali majunger aser tax magütsütsüla ta noktakba ya shitak, ochi o aser tasü tait mapa lir. Naga nunger telakleni onüra tang asen sasa longbanger kangshia aliba nungi salaa adoktsüla.

Naga nunger independent asoshi küm 50 tema rarar ta angashia, Philippine nunger kati asüngdang: Naga nunger tangar dak memetaloki (mozü, süoshi aser tanga oset-tsüset, cari, merang, kojal, ama maten), chiyungtsü (shi, ango, entsü, jang, mertsü, süngo-lio, süngjang-lijang aser sopen, tooth paste, shini mamatsü, metsüktsü, etc) Nagaland nungi adokba aser yangluba agi küm asem  litettsü asü masü ta asüngdang. Tzümar ana-asem kati Morani-Mokokchung lenmang anogo ishka mokdang nung Nagaland district pezü (Mon, Longleng aser Zunheboto dena) kangashiba jet ta kü mulungjangi ait aser ni langzü, “hapta ka-ana dang  ariena litettsü.” Pai langzü, “Süra nenok independent bushitsü malang aser independent nation ka amai melitettsü” ta ashi. Aji shitak. Covid-19-i anogo 50 shi lockdown süa aliba mapang Naga nunger health and food security maliba jangjaa metetogo.  1940s nung Naga nungeri independent jembibaji mapang balaka liasü, saka tanü iba putu den medemdangra independent bushitsü aser jembitsübaji mapet aser tamakoktsü südi. Ita ka danga India nungeri meyarira melitettsü, anungji nüburtemi koda independent indang jembitsü. Naga nunger revenue generation mali, kechiaser industry kecha mali, Central govt. nungi kechi sanction arur aji dang lemsa chiteper kazür, iba jagia telok aika lemsayonga aludang shitak target group tobo 1% agi dang atonger. Tanü kechi  GoI-i agütsütsü jembir iba nungji temulung sür pelaseta ali tajungba ta bilemer. Naga nunger tangar memeneptsüsa putu aika dang nüjiso bushiri rajang kümdakja lir.  Samaria chubai pei süoshi shisa aser anem sü abener Elisha tenüng tetshia temulung meyipba ama, govt. nung tenzüker tulurtemi, yimsürtemi aser Nation worker lenirtemi nübur tanüngba ola angashitsüla, aser temulung meyipa Tsüngrem tsüngdang aser nübur tsüngdang tatok meshir Nagaland yanglutsü mapang tongja tongogo. Naga lima seplangi luja luogo, asen kishikinar States meneptsü am talanglang aitatokogo ni! Yamai dang ora taya agi ojala anati pei jabaso tepseta soa achiba jenjangi aitsü ana nung lir. Naga lima temo lima nung sensakseta okrongseta aseni bendenba menen agi liteper. Melenshidi. Tsüngremi Naga nunger nem tangatetba tasen agüjang ta sarasademdi ta ayongzüker.