~ B. Lanutemjen

1989 NLTP Act passed sür küm 30 tema arur. Küm June 25 Morung Express sangdong nung ashiba agi “Nagaland has 8.1% alcohol users with 1.7% dependency and 2.9% disorder.” Ano kasa osang nungjisa “Nagaland state has higher rate of substance abuse of various forms than national average.” “Total” ta ashir saka yi jemer teimba akümba sayur. NLTP Act tamakok ozüng ka sayur. Ya shiba tai?  NLTP introduce masüdang lokti taküm koma liasü, aser introduce sür külen lokti taküm koma aji joko asadangtsü nungdak. Lenir kati yamai ashi, “1989 küm tashi yi ajemer kwika liasü, kwika asü, iba ajanga tashitak agi atonger kwika liasü, yimtsüng ka nung yi jemer kibong kwika liasü, lanur rongnung yi jemer aiür aser asangur kwika liasü. Yi ajemba ajanga kibong kwika raksa (ano ibala amala aika) itemji research süa analyze sür bener aruba kuli mangur.” 1989 dry state ta declare sür tanü tashi yi ajanga nisung südaktsüba kwi lir? Research tejangja maka kibong raksaba, balalulaba, kibong sensak atenba, school dropout, yi agi jemseta asüba aser Nagaland state rongsenketsüng nung koba tashi takoksa alur, item ajakji scientific research agir fact and figure dak ajemdaker takok aser tamakok indang jembitsü mapang tongogo. NLTP agientsü, magientsü, tashi mait kobalasa, kobala nung ozüng takangba yanglushitsüla item ya reprangshitsü nungdak ta ajiteter.

Nagaland Liquor Total Prohibition Act (NLTP Act) tenzükba

Küm semer tejaklen (1989 nung) asen linertemi Yi tongpang asoshi kanga meranga raraogo. “Yi tongpang ya internet maka, local STD nung dang jembiba mapang, raraba tongpang ka lir. Taoba lenirtemi taküm tenla agüja inyakba yabo jungrara inyak ta bilemer. Lenirtem kin ajak nungi, international level nung takotettemi anir, par mapang mapa tajungtiba inyak. Impur nung lanur ka ama lenir sülen anishiba mapang kirongdang mi temseper ama memejang, mechiyung, arrest warrant-bo arur ta  inyakba ngua süngmangseta anitak. Mokokchung District tama dry declare sür Nagaland atema asen Aor yakpang sür Kohima yimtiba nung Rev. Reküm nungeri anir hunger strike nung tambur aika collapse süa hospitali anir ao. Pastor lanur tashikartem asemnübuba nungbo majitettsüsa, renanger, soup aser tzü magizükteti ngua nibo nüksü aluadok.  Iba tongpang takok ngur arudang Mokokchung nung Kotak süngküm nunga asenok yamaji agizüktsü ta nüklai arua agizük. Ni shinübaji dry state  ya azü agi alanga, injang agi amok merena, tasü tonga lumitsü ta atemzüker inyaka akok.” “Iba yi tongpang takok angutsü atema Ao arogo kati dang shilem magiba malitsü. Yimyim agüja sarasadem aser sentong balala ayonga agia aruogo aser ano iba mesükba sentong agia arudagi.” Naga lima dry state declare asübaya tamangdirtem  nüktsü aser sarasadem agi alangzükba, parnok dang peladi. Saka “iba ya tanu tashi nung ola aser zülu nung dang takok ta jembirashi practical nungbo tamakok kümer lidaki.” Taoba putu ama tanü asen tendaka asenoki kechi inyaker tarutsü putu nüburtemi hau ta shitettsüsa lungjemer nokdaktsüla. 

Lemang balala ajanga nokdanger saka yi jemer tiemba akümer, ya kechiba? Yi nokdangba den temerenshi tapu balala amshi, ki jen raksaja, bottle jaksaja tayoker amokmeren; tajungshi o dang nungi tali atakatem o jembi, yi ajanga tashidak aser teraksa adokbatem tesayuba agütsütsü melena  yi ajemer anema  inyak, iba amala mapa agi tajemer ka danga tangatetba dangi arua melenshiba mangu. Iba inyakyim yagi yi ajemba manentsü. Iba sentakba nung tesayur kari yamai zülu, “Alcoholism is a social disease. NLTP Act kisüng jagi  solution magütsür. Nagaland dry state nung yi talubosa angur. Kechiba nüburtemi yi ajemer aser taküm jangratem bushir? Koba kuli ajanga yi dak taküm metaloker alitsüsa akümer? Iba teraji bushitsüla aser awareness education agütsütsü nungdak. Yi ajembaji temenen ta sayutsüngiba method ya endoktsüla aser yi jemerji temenen pur ta sayuba theology ya anentsüla. Detox ministry arogo aikati agütsür, ano iba den long term accompaniment aser caring sentong akatsüla.” Yi bottle kisüng bendena jakrepa indoktsübaji solution masü. Hau, “tetenzükeri tesüngmangtsüka anibelem arema, lumia iba tongbang anema raraogo, saka nübur aser government tangatetep kangabo mali oda by force agi ozüng yudaktsüba agi tamakok adoker alitsü akok.” Anungji NLTP Act-ji amajok mekümdaktsütsü asoshi arogotem aser lokti balalai kechi inyaktsüla.  Nagaland dry state declare asüba sülem arogoi mapa inyakba aikabo mangur.

NLTP Act sülen tamakok kar

“Total” prohibition ta asüba nungji yamai zülua angur:

No person shall:

(1) transport, import or posses liquor,

(2) sell or buy liquor,

(3) consume liquor,

(4) manufacture liquor; and

(5) use or keep any material, utensil, implement or apparatus whatsoever for manufacture of liquor. 

Iba Act passed asübaya takok tulu ka. Saka iba dak sentakba maparen inyaka aodang takok aser tamakok, tajangzük aser takoksa atalokba ngua arudagi. Item tamakoktem aser meinyakjembatem asoshi tanü arogotem, tenzükertem aser lokdi balalai kechi ashir? Dry state declare asüba ya zülu nung ayuba kisüng ya takok ta mebilemtsüla,  saka mapa takok ngua meinyaktet nungbo ozüngji amajok kümdaktsü ama ajiteter,  tamakok kar;

  1. Black market tali züina aküm
  2. Adulterated Yi amshitsü tenzük
  3. Demand control mesütet
  4. Ozüng raksar tali adok

Item tamakoktem ngua NLTP Act ya nüngdak asü menüngdak? Itemji ozüngi koda alentsü? Ya agien asü, magien tajungba?  Arogo aser telok tentet balalai kechi ashir? Iba Act ya degreebo tulu ka angu, saka mapa mashi ama lir, nisungba dak malang tenüng tulu agütsüba ama lir. Naga lima tebilemtsüji auüri auür dang na auür ta mejatetba, yi jemeri na yi tejem ta yi jemerdang meshitet, ozüng raksari tangar ka dang na ozüng shitak amshiang ta meshitet ama lir. Ozüng ya Naga nunger tulu, tila, tashir, mashir, police, public ajak asoshi liromedema mamshitetra Act tapu tapu yangluaka amajok lir. Ya koba teloki metong metonga yanglutsü? Kodang Bihar nung total prohibition declared asü gari lendong ajema aküm. Tetsür tanur anema tashiyim inyakba mapa tamajung 97% agi tajemba aküm. Mapa tamajung inyakertem 68% agi tajemba aküm ta ashir. Anungji temaba menden nung alir nungi tenzüka ozüng shitak meyutetra aser ibaji anema nüburtemi ola matoktetra mashimaluang sayur,  aser lanur kar anitena  anebaluba jagibo  NLTP Act nükjidongjibo madaloktsü,  anungji item anema arogo aser lokti balalai kechi ashir? 

Tangar limatem Yi anema ozüng amshiyim

Ozüng raksatem temelenshi ken reprangshitsü nungdak. Ita ka tepokdak ayuba, sen Rs. 500/-, Rs. 200/- penalty agiba jagi meperir. Akangshia yanglutsüla.

  • Islamic Countrytem nung Islamic yimsü/Quran tesayuba ajanga yi ajembaji par tsüngrem anema (Crime against Allah) ta züngshir anungji Govt-i yi anema ozüng tesashi yanglur.
  • Saudi Arabia nung yi ajemba metettsü asoshi  azü tendanger aser yi jemer nisung ta putetra par lima arrtsü (border) ajanga maitdaktsür.
  • Kuwait nung yi amshiba metetra zero tolerance. Driver yi jemer gari aniba metetra senchi den küm ana jail.
  • UAE nung yi jemer gari anira D 20, 000/ senchi aser office nung inyakertem kecha notice makai mapa nungi anentsür.
  • Taiwan nung yi jemer gari aniba metetra Taiwan sen NTD 1,00,000 senchi achir aser police-i mesüra ozüngi nübur azüoka ayutsü puri yi jemer gari anira 2,00,000/- senchi achir jail nung ayur.
  • Alima aika nung yi jemer office-i arura, mapa nung anentsür.

NLTP Act  Nagaland Gazette April 24, 1990 adokogo aser iba temzüng chapter IV nungi penalty tapu aika zülua angutsü. Tanü tashi nung ozüng aibelener kwika merenshia ali?

NLTP Act takok ngua bener outetba kuli kar

NLTP Act ya lokdi balala takhangba (pressure) ajanga mapa akümba lir. Kodang Nagaland dry state declare asü Naga limai yi kodasür maitdaktsütsü ta asüba  nung tali temulung agütsü, saka tajemerbo memelenshi. Tajemer melenshidaktsütsü mapa meranga meinyak. Yongji kong nungi kodasür akhi ama yi ngua ajemtsü iba lemang dang bushi aser tayoker jendi aküm. Adulterated yi jenjang aika tur ayokba agi yaoker takar aküm, saka nübu tajung aika anojungi alima nungi pila. Anungji dry state declare sülen yi nokdangtsü merangba ama tajemer melenshidaktsütsü merang asübo Naga lima-i yi aitbaji nokdangtetla aser yi jemer tajemba kümla. Ajemyonga yi dak metaloker alima (addict) aikabo makala. Meinyak/meinyaker ta masü, saka yi aginer (Demand) lira tayokerji (Supply) lir ta meteta anaji mademdanga (balance) inyaktet asübo iba dak tali takok ngur lila. Demand nokdangtsü arogoi aser civil society balalai inyak nungbo NLTP nungdak madokla.

NLTP Act akangshitsü lemang ali  asü mali?

  • Mezüngbuba nung arogo, yimden aser lenirtem ajak lungjema yimtsüng aser town balala nung iba dak sendakba shisatokden sentong ayonga tangatetba tajung agütsütsü nungdak.
  • Prohibition Act passed asüba agidangbo yi tongbang takok mangutsü, saka policy mesüra strategy aika shisadanga yanglutsü nungdaker. Loktiliba tajungba yanglushia bener aotsü asoshi department ajak külemi lungjemer asameyang balala rakpoka jembitsüla. ABAM, NBCC-i dang masü, saka Excise dept. Revenue Dept. Women and Child development, Health and Family Welfare, Police, Arogo aser Associations ajak lungjemer koma inyaktsü iba sensaksem akatsüla.
  • Ochi aser ozüng raksartem anema arogoi ola tulu adoka nungdakra lokti ayonga (people movement) Naga yimden lenir den tongteprateptsü lemang bushitsüla.
  • Mungdang, arogo aser lokti balalai Rehabilitation centre, Detox camp lapoka arogotem ajaki atepdang wadang (Home mission) ka ama inyakloka aotsü lemang bushitsüla.
  • Primary prevention ya kangasa rongdak nungdak ka lir.  Anungji Govt. den angatetba school syllabus nung inoktsü aser mungdangi Sunday school kaket nung bendenloktsü lemang bushitsüla.
  • Yi tongpang anema nokdaktsü aser yi-lar anebaluba mapa nung shisashirtemi shilem tulu agitsü lemang sadema lir. Yimtsüng, tzükong aser Ao kaketshir telungjemi shilem agitsüsa mungdangi shisalendong yanglutsü  nungdak lir ta ajiteter.

O tembang

Noklang nung noklang temelenshi adoktsü asenoki mebelemli saka tajungtiba shisadanga bener aotsü nungdaker, iba den item tebilemtsü teratem kong nungi adoker ta metettsü tim. Yi jemerji alitsü, saka alcoholic madokdaktsütsü aji inyaktsüla kechiaser alcoholic abuse ya kibong ka aser kin ka asoshi tashidak mesen tulu asünung kibong nung yi ajemer ka lira ibaji ajanga kibong rangben shirangdaktsütsü.  Anungji parnok den relationship yanglua family counseling, alcohol treatment, spiritual awakening agütsütsü kanga tongtipang.

*****