Tenyaba Mapa nungi Tangazüktsü:

Osemlok

~Bendanglemla Longkumer

“Ni ne nem tenüngsang agütsütsü: kechiyong ne tetsübutsüka aser tesüngmangtsüka yanglua lir. Ne mapatem tesüngmangtsüka: aser aji kü nelai metet.” T. Ken 139:14.

Yanglushidi Sensaksem Sabang sendong achaayangeri “Mary Mead-i Aoer Lokti aser Arogo Renlokdaktsuba Tenyaba Mapa nungi Tangazüktsü” nung I. Narola McFayden-i o lemsaba nung osemlok agütsütsü kü nem maongka agütsü nung kanga dang pelar aser yangi iba osemlok nung tanü lanu putu sangeria kechi inyak nung ajungtsü ta asüba tebilemba den tayongzükba kar lemsateper.

American Baptist Missionary Dr. Clark aser Mary Mead Clark ya Nagaland nung küm 40 tema tenyaba mapa nung American Baptist Mission ajanga yoka inyaka liasü. Par kibongi tenyaba mapa inyakba aika dang azünger aser angur. Saka tanü onük jembiri Mary Mead Clark mapa indang zülu asü nung lai inyakba mapatem aser iba dak sentakba nungi asenok atema kechi tangazüktsü angur itemji kar lemsateptsü. Lai mapa inyakba aika rongnung asen nüburtemi temulung chia aser tongtibang shilem ka ta bilembaji kaket rüju tenzükba ya asütsü. Mary Mead Clark-i 1878 nung kaket rüju tenzükba indang tanü onük nungji angur aser iba tesayuba nung amshitsü atema Mary Mead-i kakettem renema sayuba ajia angur. Mary Meadi  parnok Assam nungi Nagalandi atua tenyaba mapa inyakbatem A Corner in India nung züludena lir.

Mid 19th-20th century tsüngda nung America Baptist Mission Society-i  tetsür missionary aika tesem balalai yokba angur. Parnok tangatetba kaji, tetsür missionarytem ajanga tetsür telok den metetpelatettsü aser ibaji ajanga teburi majangtetba tesem aika nung yaritettsü nükjidong nung liasü. America lima nunga, arogo aser kibong nung tetsür nem yimli aika magutsü nung, parnok pei temeten atema noktaktsüsa mapang kati bener aru. Missionarytem jia kinungbur den dang repsemer aotsü melashi kija alirtem atemabo tenokdangba liasü. Item temesü lemangji ngua Sara Doremus-i Women’s Union Missionary Society (WUMS) 1861 küm tentet, ibai interdenominational liasü aser iba ya tentetba ajanga kibong mekümi alira otettsütsa lemang sadema lapoktsü. Tetsür rongnung tetsüri inyaktsübaji kanga tongtibang ta parnoki angatet. America nung Protestant Missionary Movement ajanga, parnok aika lenisüba nung shilem balala agi, leadership, fund-raising, publishing, cross-culture ministry amala agika nung shilem tulu agi. Tetsür missionarytemi tesayur mapa, medical doctors/nurses yamala nunga shilem agiba otsü nung azünger.

America lima tetsür jenjangji kecha balaka tajungbo masü asü ta otsütem ajanga angur. Tebur atsünga yimden and loktilibaren yimyaji liasü. Rongsen ketsüng aser yimdenren nung ketdangasüba dang masü, saka kibong nung tanurtem koda anitettsü, tamangba yimsüren nung asüngdangyatsü, shitak asü tai item amala ajakji tebur majangiang tetsüri kecha mesütetba mapang liasü. Tetsürji kaket shisatsüa University level tashi azüngtsü memela, pei sasa pei taküm nung telemtetba kecha magitettsüsa iba jenjang nung liasü. Saka meilungi tetsürtem temeten balala atema noktaka, takhangba ola adoka talenba aika nungi nüchiso anguba otsütem nung züngshir.

Mary Mead-i Inyakba nungi Tangazüktsü kar

Alima talang nungi, tensa mapang kanga dang tazü mapang süaka Mary Mead Clarki temulung ulua Tsüngrem dak tamang yur kinungbu den külemi mission mapa nung shilem agitsu Northeast-i aru. Shirang wara den, taküma dena kechi koma asütsü item tiaji mongui dang süaka temulungtetba tulu agiba ya tesüngmangtsü ka lir. Tanü onük jembiri onük terok lemsar kanga dang abensaa lemsatepogo, iba nungi tangazükba kar yamai nenshia lemsateper.

Mezüngbuba nung, Mary Mead-i tenyaba mapa inyakba ya reprangdangra, lai contextualization yimya nung mission mapa ya inyak ta angateter. Oshi oben balala den sobaliba khenyongi balaka, item nisungtem rongnung parnoki angatettsüsa lesson renemtetbaji takok onsara tulu ta meteter. Local oshi amshiba dang masü, parnok rongnung teti tetshia aliba, moral aketba otsütem bendena iba nungjagi zülutsü aser azüngtsü angazükdaktsüba jagi sayur lai American culture masü saka asen sobaliba nung sayutsü merang ta angur.

Tanabuba nung, la ya kanga dang taremzük aser tatasa akaba tetsür ka ta angazüker. Missonary ka mapaji evangelism dang masü saka pa/la koleni oa tenzükdir, par cultureji angazüka, itemji medemdangtepa sayutsü merangba ibaji missionary method nung tongtibang. Maritepi dang, taremzük agi Laishiba otsü den asen sobaliba otsütem medemdanga sayuba nung takok anguba angur.

Tasembuba nung, Mary Mead-i pei taküm atema mebilemi asen nübur dang melenshirbo ta sür tenzükba angur. Talang nung/ooji ta nung nükla yur, Mary Mead-i education agütsüba nung temulung agütsübaji tangazüker kija taküm atema dang masü, ibaji ajanga lokti atemaa tajangzük asütsü ta tangatetba nung lai school ya tenzüka tangazükertem azüngba mapang apir anitena kaket shisatsü den, tesayuba balala agütsü ta  angazüker.

Pungububa nung, lai Laishiba tesayuba ajanga temulung meyipdaktsüba dang masü, la mapaji taküm rangpen (holistic) liasü ta angateter. Evangelism dak alaka ano education, health and hygiene, ola-angla mapa balala sayua tenzükba jagi tanübo item süngjangji lokti nung temelenshi bener arutsü.

Trokbuba nung, Mary Mead-i gender equality indang shisatsü agütsüba angur, kechiba süra tetsür tebur ajakji Tsüngremi pa mesükba nung yanglu ta lai züngzünga angateta liasü. Iba dakji alaka ano, ajaki Tsüngrem yimli züindaktsüba nung shilem agitsüla ta laisa angatetdaktsü. Lai aniba school nungji tetsür tebur mebendangi shisatsü agüja angazükdaktsü aser la melentsü nübü tajung anitet. Aser lai temulung toka aini aodanga teka melena toktsütettsüsa Aotsür Tongpangla anitet.

Tenetbuba nung, Mary Mead ya kinungbu sülen kinungtsü asübayong aruba dang masü,  lai mapa aika nung shilem agiba angur. Shisatsü nung renlokba mapa kar: Ao Naga Grammar with Illustrative Phrases and Vocabulary”, A Corner in India, iba kaket ya scholars temi one of the books that is culturally important, and is part of the knowledge base of civilization as we know it, ta asüba criteria nungi shimba angutsü.

Otempang/Tebilemdangtsü kar

Tatemsa tanü putu tensa tia den peta bilemdangtsü kar lemsateper. Ao lima Molungyimsen ya, 2003 küm Ao Kaketshir Telungjemi “Cradle of Education” (koba Naga Student’s Federationia agizüka ayu), ajiser ano 2011 nung Nagaland Chief Minister-i iba yim ya “Naga Heritage Village” ta nüngja agütsüba konangji Mary Mead mapa ajanga lir. Süra tanü la ama mesüra Tongpangla ama tenüng nung nüngjalok mapadong kecha ali asü mali? Lira temoa, melira tebilemdangtsü mapang masü na?

Alima otsüren nung tetsür otsütem aika meimbanga/nübanga kar. Itemji amadoker mesüra mesükshii yuja lir. Kasaji Mary Mead taküm otsüjia yua ali asü koda? La dang masü tetsür missionary aser asen lima nungi mezüngpur rongnung tetsür kwika densema Tsüngremer yimli atema tenzüka aruogo talisa Aotsür/Aori shilem agibatem itemji bushitettsü mapangji tang ya asütsü. America limaji tebur atsünga aliba yimli nungi aruji parnoki par lima tetsür temeten atema ola adokba nung shilem magiaka, asen limai arua parnoki ibaji atalokdaktsütsü merang ta angateter. Hau, missionary karbo kanga dang patriarchal mindset asüji, school nung aser arogo nung inyakyim aji oda yangerteta yutsür alitsü südi. Mary Mead inyakyim nungji tetsür tebur mebendangi kasa tesayuba agütsüba den ano tetsür atema tentet tenzükba nguogo. Anungji asenok patriarchal mindest nungsa tenyaba mapaji inyaktsü asü mesüra, tangatetba putu tensa ka ama tetsür aser tebur ta kecha tebendang makai Tsungremer yimli asoshi lirumedema inyaktsü ibajia shisadang nung koma.

Tanü onük lemsaba nungi, tebur atsünga otsütem züluba ajanga tetsüri ajangshiba, shilem agiba otsütem iba jagi nembanga alibaji otsü zulushiba ajanga temai bener adoktsü ta angateter. Tetsür otsü züluyim (feminist historiography) tangatetbaji tebur atsünga zülutena alibaji entokdi ta masü, saka asentenshia otsütemji tasen küma züngshiba ajanga shisatsü/tangatetba tasen bushilokdi ta asüba nükjidong lir. Kodang otsütemji tetsür/tebur ajak enoksema züludir, tetsür enoksemba dang masü saka tebur atsünga züluba jagi kechi koda tetsur rogo züdoka toktsü ibaji bushiteta reprangshitsü ajungshir. Aji dang masü asen nüburtemi Naga lima tenyaba mapa nung shilem agibatemjia zülu tenzük nung tajangzük tulu südisü ta bilemer.

Tanü Naga nunger lanurtemi teka/ola-angla mapa mashi/amadoker, white-collar job nung dang rangetter kaket shisatsü bushir aser shisaliok nung tesayuba agütsüba yimyajia yamaji sayur. Engineer/doctor ka akümtsü, sorkar mapa ka nung itasen ayong ayonga agia alitsübaji tsürabur aser lanur teimba nükla asür, aji sürbo tanga lemangtembo maka amai dang metetshir. Iba yongji tanü Nagaland nung educated unemployed jenti kümogo. Covid-19 pandemic ajanga teka mapa, kisü jensü, alu ayimba nung temulung agütsüshitsüba, small scale industries, entrepreneurship yamala ya koda tongtibang ta asüba sabang balala nung lemsatepba angur. Mary Mead-i inyakba yimya (method) nungi angazüka, shisaliok nung tangazüker nem pei sasa noktaktettsü shisatsü aser teka mapatem ya angazükdaktsü nungbo tajangzük asütsü ta bilemer. Shisaliok tesem aika nungji teka mapa sayubaji lir saka temulung magütsür mesüra tangazükeri mejangrar, anungji iba ya ajungshia asüngsashitsü tongtibang südisü ta bilema item tayongzükba den kü osemlok tembanger.

“Kechiyong tetsür kechi koda tebur nungi, aji oda teburji tetsür agi aso; saka ajak Tsungrem nungi lir.” 1 Korint 11:12